Ka jingïapynbeit ban pynïasoh ki 9 ngut ki MLA ka UDP sha ka BJP ka dei ka rai ki heh na Delhi: Hek

Shillong, Nailar 31 : U Nongïalam ka BJP bad MLA ka Pynthorumkhrah Bah Alexander Laloo Hek ha ka sngi Nyngkong ula ong ba kano kano ka rai halor ka jinglah ban wan pynïasoh ki 9 na ki 12 ngut ki MLA ka UDP bad katto katne na ka TMC sha ka BJP kan dei ka ban shim rai da ki Nongïalam na Delhi.
U bah Hek ula kynthoh ïa kane halor ka khubor ba palat 9 ngut ki MLA ka UDP bad katto katne ki TMC kila pynkhreh ban leit ïasoh noh sha ka BJP ha ki khyndiat sngi ban wan.
“Ka jingkhang jong ka BJP ka plie ïa baroh ba kin wan ïasoh. Ngi la phaikhmat sha ka Sorkar ban ïalam da ka BJP ha Meghalaya ha u snem 2028” ong u Bah Hek.
Hynrei ula ban jur ba ka State Unit kam don satia ïa kano kano ka bor ban shim rai halor ka jingwan ïasoh.
“ïa kum kata ka jingkylli phi kylli ïa nga, tang ka BJP ha Delhi kaba lah ban shim ïa ka rai halor kata. Ngi don u Chairman, ba khmih ïa ka NEDA jong ka party, ki dei ma ki kiba leh ïa kiei kiei baroh. Hynrei haba ïadei bad ka jingkhot ïa kino kino ki political party ne nongïalam, ka rai ba khatduh ka wan naki nongïalam na Delhi jong ka BJP” ong u Bah Hek.
Une u Nongïalam ka BJP ula kubur ba ki jingïalang ki la urlong, hynrei kane ka kam ka shong beit ha ka rai na Delhi.
“Hooid, kila don ki jingïalang bala pynlong ha kine ki khyndiat sngi hynrei ïa kane ka kam ba mynta, kan dei beit ka rai jong ki nongïalam na Delhi. Baroh ki rai, baroh ki jingtreikam ki wan na ki nongïalam na Delhi. Kane kam dei ka rai ka ban wan na ka State BJP” ula ong.
Halor ka jingïasngewthuh jingmut hapdeng ki paralok ba ïatreilang ha ka MDA, u Bah Hek ula ong ba um don satia ïa ka hok ban kynthoh halor kiwei pat ki seng saiñ pyrthei.