Dei bah Pala ba wanrah ïa ka NEHU, NEIGRIMS bad kiwei kiwei ki shlem hapoh ka jylla: Dr B.Kharkongngor

Khliehriat nailar 31: U bah Vincent.H.Pala, u ban ïa ai reng biang na ka bynta kane kane ka M.P Election ba shiteng samoi u la sdang mynta ka sngi ïa ka jingialap election bad u la sdang nala ka jong ka shnong, na shnong Lamyrsiang East Jaiñtia Hills District, la sakhi ba ki dang bun ki nongkyrshan kiba ju kyrshan ïa ka party Congress ki dang neh kim pat shym la kynriah satia sha kiwei pat ki party.
U bah V.H.Pala u la pynpaw shibun kiei kiei kiba dei ki kam ba radbah ba la leh da ka party Congress hapoh ka jylla Meghalaya bad bynrap ruh da kaba ong ba dei tang ka Congress hi kaba lah ban ieng pyrshah ïa ka party BJP, na ka liang ka Dr Banidashisha kharkongor, haba kren ha ka jingïalang, ka la pynsgew sha ki paidbah ba dei u bah Vincent .H.Pala uba la wanrah ïa ka skulbah NEHU, ïa ka NEIGRIMS hospital bad kiwei kiwei ki shlem treikam kiba donkam hapoh ka jylla Meghalaya.
Ha kaba ïadei bad ka jing ithuh ïa ka ktien Khasi, u bah Pala u la ong ba dei ma u uba la dep lam lynti bad iakren ha ïing dorbar Parliament ban ithuh ïa ka ktien khasi u la ong shuh shuh “Nga la shah khot ha u Phadar Sngi ha kaba u la ong bad ken ha nga ba lada im ka ktien, im ka jaitbynriew, kumta ngi la sdang ïa ka kam bad ruh da ka jingiatreilang bad u Prof, David Syiemlieh uba hikai ha NEHU, shuh shuh ngi la wad jingiarap na ka khasi departmet na NEHU bad ngi la ioh lum ïa ki jingdonkam baroh na ka Khasi Deaprtment bad pyntyllun ïa ki kam, katta ruh ki la kynnoh ba nga khlem leh eiei, wat ïa ka Khasi Authour Society ruh nga la ai ki jingiarap ban shna ophis, nga pynthied ïa ki computer bad ki jingdonkam hapoh ophis bad nganta ngan sa rah ïa ka jingiakren sha Delhi ha kaba ïadei bad ka jingithuh ïa kaktien khasi”
Haba kren pat ha kaba ïadei bad ka party National People’s Party, u bah Pala u la ong “Nga la dep iohi ba ka NPP ba la ialam da u Conrad Sangma ka la shet kylla ïa ka ri khasi ha kaba ïadei bad ka mat CAA kumjuh ruh ha kaba ïadei bad kiwei kiwei ki mat ruh kum ka jingthmu ban pyntreikam ïa ka FCRA, ST bad kiwei kiwei ki bill ruh nga la iohi ba yn nym don ba nud ban kren pyrshah eiei ïa ka BJP, na kata ka daw ym donkam ban pynlut por kai bad kine ki party rit” shuh shuh u la iathuh ba ki don bun kiba la mih na ka party congress hynrei mynta ki la kwah ban wanphai biang sha ka congress “Ynda hadien hadien lei, ym donkam ba ka congress ka pynrem ïa ki party rit, hynrei ka BJP hi kam pynrem ïa ki, wat duh jingkyrmen, ha shwa ka election ka ban long ha u snem 2028 ka NPP kan khylllem namar bun kiba ju wan sha nga bad kyntu ban shna party thymmai, ki don bun kiba la khreh mih na ki party bapher bapher bad kane baroh dei ka BJP kaba pyrshang ban pynklumar ïa ki party rit ban pynduh noh ïa ki party rit, kumta ha kaba kut dei ka congress hi ka ban ieng pyrshah ïa ka BJP, ka BJP ka don tang 37 percent ka vote kiwei kiwei party lada khieñ lang ki don 63 percent, kumta khlem artatien ki briew kin phai hi sha ka congress, ki briew mynta ki la ngiah ïa ka BJP kum ba jia ha kiwei kiwei ki jylla” ong u bah Pala.
U la iathuh ruh ba ka NPP ka shna surok ka hap shim da ka loan ha kaba mynta ka Meghalaya ka dap ram haduh T26000 hajar klur tyngka katba ka mang tyngka ne ka budget jong ka meghalaya ka don T29000 hajar klur, kane baroh dei na ka daw ka jingduna palat ka jingioh lum khajna jong ka sorkar.
Na ka bynta ka surok kaba ha ka thaiñ Umpleng, Lamyrsiang, u bah Pala u la ong ba khmihlynti ba ha kine ki bnai tlang un shna noh ïa kane ka surok
“ki RSS, kumjuh ruh ka party BJP ki ialeh beit kumno ban pynduh noh ïa ka Reservation, kumba jia ha Pakistan, ha Nepal bad ngi iohi hi ba kane baroh dei ka BJP kaba leh ban pyntroiñ kaba kwah ruh ban pynduh noh wat ïa ka Schedule Tribe, shuh shuh ha kaba ïadei bad ka FCRA Bill, u la ong ba kane kan ktah jur, namar hapoh kane ka aiñ lada ym lah ban pynthymmai ïa ki license, lada ym biang ki kot ki sla yn sa shah knieh noh la ki dei ki skul ne ki hospital ne ki iingmane, ïa kane ka bill la mut ban pass da ka sorkar BJP, hynrei dei da ka jingieng pyrshah ka congress la sangeh ban pass. Ka bill FCRA kaba long kum ka licence ba ai ka sorkar ïa kino kino ki kynhun ban wanrah pisa na bar ri ban shna skul, ban shna hospital, shna ïingmane ne ban tei ïa ki jingtei.
Shuh shuh ka don ruh ka Bill ba lada pynkylla niam hap ai shuwa da ka notice sha ka sorkar bad lada lap ba pynkylla niam da kaba kular kam, kular iathoh shongkurim ne kino kino ki jingkular yn sa shah set patok ïa uta uba pynkylla niam, shuh shuh, lada iakren eiei shaphang ka niam wat lada dei da la ka jong ka mon, hap hi ban ai notice.
Shuh shuh la ong ba ka BJP mynta ka dang pyrshang ban pyntreikam ne ban move sa ïa kawei ka bill bad kata ka dei One Election One Nation, kaba mut tang kawei ka elction hapoh ka ri.
Na ka liang ka Dr. Kharkongngor, kaba dei ka secretary jong ka meghalaya pradesh mahila Congress, ka ai ka jingiaroh ïa u bah Pala bad ong ba dei u bah Pala uba la ieng rangbah bad khyllie biang ïa ka party Congress bad ong ba kane ka paw ba u dei u briew uba don shisha ka nongrim kaba skhem, watla bun ki jingkynthoh hynrei u ai mynsiem ïa ki nongtrei ka party. Ka kyntu ruh ïa ki paidbah ba ki dei ban sngewthuh ïa ka election MP, election MLA bad election MDC, ka la bynrap ruh da kaba ong ba ki don ki seng kiba shu pyrta ha surok ba ieid jaitbynriew, hynrei dei ban peit ïa ka party kaba trei, namar ka congress ka la wanrah ïa ka skul bah NEHU, ïa ka NIEGRIMS hospital, IIM bad kiwei kiwei ki kam kiba radbah hapoh ka jylla la leh da ka congress, ka la kren ruh halor ka jingtreikam radbah bah u nongïalam ba ha khlieh jong ka party Congress, u Rahul Gandhi uba ju ieng pyrshah ïa ki kam bad jingthmu ka BJP kiba ym sngew iahap, ki bill, ki aiñ ka BJP kiba ju pyrshang ban pyntreikam kiba ym sngewiahap ban pyntreikam hapoh ka ri.
Kiba la ai jingkren ha ka jingialang ki kynthup ruh, u President District Congress Committee, East Jaintia Hills District, u bah Micheal Nongtdu, u MDC barim, u bah Richard Lyngdoh, Youth President DCC, u bah Daki Nongtdu, u President District Congress Committee, West Jaintia Hills District, u bah Rikut Parien,u MDC na Jaintia, u bah Madonbai Rymbai bad kiwei kiwei.