Mad jingeh ki nongñiah trok marsien rung ha Ri Bhoi, sha u DC bad SP pynsngew ka MCTODA

Nongpoh, Nailar 31: Ki trai trok bad ki nongñiah trok kiba kamai jakpoh haka jylla bad shabar ka jylla, hapoh ka lama jong ka Meghalaya Commercial Truck Owners and Drivers Association (MCTODA), mynta ka sngi ki la leit ban ïakynduh ïa ki bor District ka Ri-Bhoi ban ïakren halor ki jingeh bapher bapher kiba ki ju kynduh haba ki wan rung bad mih na ka District Ri-Bhoi, kaba long kawei na ki jaka rung bad mih jong ka jylla.
Hapdeng ki mat ba ka kynhun ka la wanrah sha ki bor district, kawei na ki mat ba kongsan ka long halor ka jingdonkam ïa ki jaka ieng bad shongthait kyrpang ïa ki trok bad nongñiah trok.
Kane ka jingeh ka la nang jur hadien ba ki bor District Ri-Bhoi ki la pynmih ïa ka hukum ban khang ïa ki trok ban ieng ha ki rud surok ha shilynter ka surok bah jong ka District, da ka jingthmu ban pynduna ïa ki jingjia aksiden bad ban ïada ïa ka jingim jong ki paidbah.
Katkum ka jingpynpaw jong ka kynhun, ki nongñiah trok ki sngewthuh ïa ka jingdonkam ban pynneh ïa ka jingïaid beit bad ka jingshngaiñ ha ki surok, hynrei ki ong ruh ba donkam ban pynbeit ïa ki jaka ieng bad shongthait kiba biang khnang ba ki nongñiah trok kin ym shah pynbor ban pynieng ïa ki kali ha ki jaka bym bit.
Mynta ka sngi, ka MCTODA ka la thmu ban ïakynduh ïa u Deputy Commissioner ka Ri-Bhoi District ban ïakren bñiah halor kine ki jingeh. Hynrei namar ka jingbym don jong u Deputy Commissioner, ka kynhun ka la ïakynduh noh ïa ka Additional Deputy Commissioner, ka Kong Balakyntiew Ranee bad haka juh ka sngi naka liang ka kynhun kala leit ruh ban ïakynduh ïa u Superintendent of Police ban ïakren ïa kane ka jingeh.
Ha kane ka jingïakynduh, ka kynhun ka la aiti ruh ïa ka jingthoh kaba kynthup ïa ki mat bad ki jingeh ba ki nongñiah bad trai trok ki la pynpaw, hadien ba ka kynhun ka la ïoh bun tylli ki jingujor na ki dkhot jong ka bad hadien ka jingwad bñiah kaba ka la pynlong halor kine ki jingeh.
Haba kren sha ki lad pathai khubor, hadien ka jingïakynduh bad ka ADC, naka liang u Bah Mosklandar Marngar Chairman ka MCTODA u la ong ba kum ka kynhun kila leit ban ïakynduh ïa ka kong Balakyntiew Ranee mynta ka sngi ka dei namar ka jingeh ki nongñiah trok, hadien ba naka liang u District Magistrate ka Ri-Bhoi bad kiwei kiwei ki district ki la pynmih ïaka hukum ban khanglad ïaki trok ba kin ieng harud surok, bad ka jingeh kaba jur bha bala mad da ki nongñiah trok ka dei ha Ri-Bhoi District, namar ki jingeh ba har rukom, namar kane ka hukum ka noh shilliang namar ka jingpyrkhang ka long ban pynkylluid ïaka surok hynrei ym don pat ba pyrkhat ïaka jingeh ki nongñiah trok.
Dei halor kane ka nongrim ba kum ka seng kam banse ban ïakynduh syndon ïaki bor district, namar hadien ka jingïakynduh bad ka NHIDCL kam shym la urlong bad ka por kam ap shuh ban pynslem haduh ban da dep kita ki speed corridor, bad lada ki nongñiah trok ki rung sha Ri-Bhoi ka long thik kumba ki rung haka ri ka jingkhuslai namar lada ki thaid, lada shitom lada sniew kali bad lada ka long sa kumno kumno ruh kam long ïaki ban ieng harud surok.
“Wat tang ban shet ja ban bamja bunsien ki nongñiah trok kim ioh lad bad teng teng ka ja ka dang don ha ding bad khaw-ot ki hap ban phet noh namar ka jingshah beh haki bor ka aiñ bad bunsien baroh ki jingjia aksiden ka jingshah pynshitom hi ka dei beit ïaki nongñiah trok” la ong u Bah Mosklandar, da kaba bynrap ruh ba haka jylla Assam ki don ki Lay Bye ne ki jaka ieng jong ki trok, hynrei kaba sngew lyngngoh ba ka jylla jong ngi kam don ka jaka ieng ki trok wat lada ki thaid bad ki kwah ban ieng katno katno ruh.
U la ong ruh ba lada ka aiñ ka pynshitom ïangi ka dei ban treikam lang kumjuh ïa baroh, bad naka liang ka kynhun kala pynsngew sha ka ADC ban wad ki lad ki lynti halor ka jingeh ki nongñiah trok bad kum ka kynhun ka kwah ba kane ka jingeh dei ban weng noh mardor hi khang ba ki nongñiah trok kin nym rit mynsiem namar lada ngin ap ïa kata ka jingkular jong ka NHIDCL shibun ki mynsiem kin dang duh, bad naka liang ki nongñiah trok kila byrngem ruh ba lada ym pynbeit mardor ïa kane ka kam naka liang jong ki kin nym siew shuh ïaka bai toll gate, bad hangtag kan sa mih ba ki dei ki nongpynkulmar shnong hynrei kum ka kynhun ka kwah ba ïa mynta shipor ba kin pynbeit mardor ïa kane ka jingeh tad haduh ban da ioh ïa kata ka jaka ieng trok kaba heh haki por ban wan bad naka liang ka ADC kala kular ban shimkhia bad ban thaw ka komiti ba kyrpang ha kine ki khyndiat sngi ban pynbeit ïa kine ki jingeh.