Ka jingïalang ïamir jingmut ban tehlakam ïa ka jingkhaïi beaiñ ïa ki khyllung khynnah ha South West KHD

Mawkyrwat, ‘Nailar 08: Ka National Commission for Protection of Child Rights (NCPCR) mynta ka sngi ha ryngkat ka State Commission for Protection of Child Right lem bad ka District Administration jong ka South West Khasi Hills District kum shibynta jong ka jingrakhe ïa ka Azadi Ka Amrit Mohatsav (AKAM) bad ka jingdap 75 snem jong ka jingïoh laitluid jong ka Ri India ka la pynlong ïa ka jingïalang ban ïamir jingmut halor kumno ban iakhun pyrshah ia ka kam khaii beain ia ki khyllung khynnah “Combating Child Trafficking” kaba ïa dei ruh bad ka “World Day Against Human Trafficking”.

U Advocate Rahul Pawa, Expert Resource Person na ka National Commission for Protection of Child Rights (NCPCR) u la long u nongsam bad ai ki jingpynshai kiba bniah halor ki bynta ba kumno yn leh bad ban tehlakam ïa ka jingkhaïi beaiñ ïa ki khyllung khynnah ne Child Trafficking ha kaba ïa ka jingïalang la pynlong hapoh jong ka Multipurpose Hall DC’s Office, South West Khasi Hills District.

Kane ka prokram ka dei kawei na ki bynta jong ka jingpynsngewthuh bad jingpynshai shuh shuh halor ki lad kumno ban ïaleh pyrshah ne ban tehlakam ïa ka jingkhaïi beaiñ ïa ki khyllung khynnah ne child trafficking ha kaba ïa kane ka prokram la pynlong ha ki 75 tylli ki distrik jong ka Ri India kiba dei ki jaka ba ïa khap bad kiwei de ki ri ne ki Bordering Area.

U Advocate Rahul Pawa, Expert Resource Person lyngba ka PowerPoint Presentation u la ïoh ruh ban ai shibun ki jingtip bad jingpynshai kiba kham bniah halor kumno ban pyntyllun ïa ki kam kiba ïadei bad ki lad ki lynti wat haba ki don hapdeng ki jingeh kiba bun ba kum ka distrik ka ïa kynduh kum ha ka jingbym biang ka network, ki jingduna ha ka leit ka wan, bad kiwei pat kiba long ka jingthut ha kiba bun ki kam ban ïaleh pyrshah ïa ka child trafficking bad ka long kaba donkam ba lada jia kum kine ki jingshah khaïi beaiñ jong ki khynnah lada ïoh jingtip ba don kiba kum kine ki jingjia dei ban pyntip noh mar mar hapoh ka shi kynta khnang ba yn lah ban leh ïa kaba donkam, kiba ha ïing ha sem ruh haba shah jia ïa ki khun jong ki kim dei ban pynslem hynrei mar mar pyntip sha ki bor pulit khnang ba ki pulit ruh kin ïoh ban leh bad buh da ka ehjahar.

Lyngba kane ka prkram, u Advocate Rahul Pawa, Expert Resource Person u kyrmen ba kan long ka jingmyntoi na ka bynta kiba la wan ïashimbynta bad khamtam eh ban ïoh ban pynlong biang ïa kum kine ki jait prokram khnang ba yn lah ban ïoh jingpynshai shuh shuh kumno ban tehlakam lada don kum kitei ki jingjia ha ki shnong ki thaw.

Ha kane ka sngi la ïoh ruh shibun ki jingbatai kiba ïa dei bad ka ‘Child Trafficking’ bad kumjuh kiwei de ki bynta ne ki lad kiba thymmai kumno ban leh lada jia kum kine ki kam. Lah ong ruh ba ka South West Khasi Hills District ka dei kawei na ki distrik kaba don jan bad ka Ri Bangladesh bad kaba ju don ruh kum kine ki jingjia ha ki snem kiba la dep. Kumta ka long kaba donkam ba kum ki ophisar sorkar, ki NGO’s bad ki paidbah ba kin long kiba ïatreilang kumno ban tip ha kaba ïa dei bad kiei kiei ki kam kiba ju jia ïa ki khyllung khynnah bad kumno ban ïaleh pyrshah bad thaw ki lad ki lynti ban pyllait na ka.

Ha kane ka prokram la ïoh ruh ka jingkren na ka Deputy Commissioner, South West Khasi Hills District, kong C. Kharkongngor, IAS, na u Additional Superintendent jong ki Pulit, bah W.L. Nongpluh, u bah L. Lyngdoh, Member Secretary jong ka SCPCR ha ryngkat ka jingïadonlang ki Child Welfare Committees bad ki NGO’s bad u bah S. Passah, District Child Protection Officer, South West Khasi Hills District u la ai ki kyntien ai khublei.