Plie paidbah u DC ïa ka dukan die mar bam jong ka ‘Iengskhem Village Organisation ha Khliehriat
Khliehriat,Nailar 08: U Deputy Commissioner ka East Jaiñtia Hills District, u Abhilash Banarwal, IAS mynta ka sngi u la plie paidbah ïa kawei ka dukan die mar bam ha Khliehriat West Community Hall ha kaba ha kane ka dukan yn die ruh ïa ki tiar ba shna da ki Self Help Group (SHG), kane ka dukan ka dei jong ka Iengskhem Village Organisation’’
Haba kren ha ka jingialang, u Deputy Commissioner, u ai ka jingkhublei ïa u Waheh Shnong uba la ai ïa ka jaka ban plie ïa ka tei ka dukan ban die ïa ki mar bam bad ki kiwei kiwei tiar, u la ai ka jingkhublei ruh ïa ka kynhun jong ka Meghalaya State Rural Livelihood Society(MSRLS), East Jaiñtia Hills District, kaba la lah ban pynurlong ïa kane ka kam ban pynlong ïa kane ka Rural Outlet ha Khliehriat ha kaba ki khat san tylli ki Self Help Group ki lah ban die ïa ki tiar ba shna hi, u la ong ruh ba lada kane ka dukan ka ïaid bha, kum kine ki dukan (outlets) yn sa plie shuh shuh sa ha kiwei kiwei ki jaka ïew hapoh ka District.
Na ka bynta ban kyntiew ïa ka ïew jong ki Self Help Group, ïa ki ‘catalogue’ jong ki tiar shna hi ba shna da ki kynhun SHG la upload ha ka district website (https://eastjaintiahills.gov.in) bad lyngba kane ka website yn iohi ïa ki dur jong ki tiar bad ki jingbatai ba bniah, lah ban ioh ruh ïa a ki contact number jong ki SHG kane ka long khnang ban pynsuk ïa ki paidbah kiba kwah thied (order) ïa ki tiar, ha kajuh ka por u Deputy Commissioner, u kyntu ïa ki paidbah ba kin thied ïa ki tiar jong ki SHG namar ki dei ruh ki tiar kiba bha, kiba ha ki dor kiba biang.
U District Programme Manager, NRLM, u bah K.Slong u la ai ka jingiaroh ïa ka Organisation bad ong ba ka Iengskhem Village Organization ka la lah ban shim ïa ka synjam kaba radbah bad kaba jop bad khmih lynti ba kane ka synjam kan long kaba sei soh ha kaba kyntiew ïa ka kamai kajih jong ki dkhot jong ki Self Help Group kiba don hapoh ka district.
Kiba la ïa don ryngkat ha kane ka prokram ki kynthup u Block Development Officer, Wapung C&RD Block, u Dr. T. Shylla, u Waheh Shnong Khliehriat West, u ma Langmon Bareh, u MLA ba rim, u bah Justine Dkhar lem bad ki dkhot jong ki Self Help Groups (SHGs).