Ka jingïakhih paidbah kaba dei hok ban ïoh ïa ka jingïaroh

0

Wat lada kiba bun ki ong ba kiba jingïakhih ha surok kim ju poi shano shano ruh, khamtam lei lei ki jingïakhih ba pynlong da ki Seng Saiñpyrthei. Hynrei ka jingiakhih kaba la khot pynlong da u Bah Ardent Miller Basaïawmoit, President ka VPP da kaba pynlong ka jingshah thngan ba shiphew sngi lynter, ka la pyndem tuiñ ïa ka sorkar MDA kaba ar, ha kaba ka la hap ban thung ïa ka Expert Committee ban review ïa ka Reservation Policy. Kane ka la pynkylla khongpong ïa kito kiba la ong ba kam long kaba dei ba ki nongmihkhmat paidbah kin mih ban ïakhih ha surok.
Kawei pat kaba la mih na ka jingïakhih ba shiphew sngi ka long ba kadei ka sien kaba nyngkong eh ba ka jingïakhih ka long kaba jai jai bad kaba ym shym la don watng tang iwei ruh i jingïakawang maw ne jingkren beiñ jaidbynriew. Katto katne ki riew khim jingmut, wat haba ki la ïohi ia ka jingkren ka VPP ha Assembly ruh ba kane ka jingiakhih ban dawa pynkylla ia ka Reservation Policy, ka long kaba ma bad kaba lah ban wanrah ka jingïakynad hapdeng ki Khasi bad ki Garo. U Rakkam Sangma, Myntri ka tnad pule puthi lei lei, u la ong ba ka jingpynkhih ïa ka Reservation Policy ka long kumba thang da ka ding kaba lah ban pynpluh ïa ka jylla baroh kawei.
Hynrei kumba ka jingkhmih lynti kiba ym ïahap bad ka jingïakhih ha surok, ba kan nym poi shano shano, pynban tang hapoh shiphew sngi, ka sorkar ka rai ban thung da ka Expert Committee ban review ïa ka Policy. Nangta kiba ong ba kan wanrah ka jingïakynad ruh ki la bakla ka jingïohi haba ym shym la don wat tang iwei ruh i jingjia ban wanrah ka jingïakynad hapdeng ki artylli ki jaidbynriew jong ka jylla. Ym tip kumno u Myntri ka tnad pule puthuh un sngew halor kane.
Ha ka jingshisha kane ka jingïakhih ka VPP ka la dei ban ïoh ka jingïaroh namar ka jinglong jai jai ka jingïakhih wat padeng u paidbah byllien uba la wan lut na kylleng. Nangta kaba la long ruh wat hapdeng ka jingshah kren beiñ, ka jingshah kynthoh na kiba bun ki liang, hynrei ka jinglah ki paidbah ban tyngkan ka long kaba dei ban ïoh ïa ka jingïaroh.
Ha ei phin lap ba ka jingialang paidbah kaba ki nongïalam kin pynkhuid hi ïa ka jaka ba pynlong ka jingïakhih. Wat ha ki jingïaseng jong ki Balang ruh, bunsien ïa ka jaka ba pynlong jingïaseng hap buh da ki Volunteer ne hap shu ai wai ban pynkhuid. Ki nongïalam ka VPP ki la shim hi la u synsar ban pynkhuid ia ka jaka pynlong jingïalam man la ka sngi bad wat haduh ka sngi ba la pynkut ïa ka jingïakhih.
Kum ban shu pynkynmaw hangne, ki nongïalam ka VPP kiba la kren ha Assembly ki la pynpaw shai ba kane ka jingdawa jong ki kam mut satia ban pyrshah ne ban knieh noh ïa ka bhah ba ki Garo ki la ïoh, hynrei ban pynïoh pat ïa ka hok kaba ki Samla na Rilum Khasi Jaiñtia kidei ban ïoh. La ïohi ruh ba halor kane ka mat, ka Rilum Garo ka la tylli lang mlon ban pyrshah ïa ka jingdawa ka VPP, katba ha Rilum Khasi Jaiñtia pat kila don kiba pyrshah bad pynpaw ba ym dei ban pynkhih ïa kane ka ishu,ïoh ba ka mih ka jingïaumsnam hapdeng kine ki arkynhun jaidbynriew kiba ïashong ïasah lang ha kajuh ka jylla. Kiba pyrshah ki la kynnoh ruh ba kane ka jingleh ka VPP kadei tang ka buit ban jop ïa ka elekshon MDC ha u snem 2024.
Pynban haba peit ïa ki election manifesto jong kiwei pat ki Seng Riewlum, kum ka UDP, ka HSPDP kamat ban review ïa ka Reservation Policy ka don ha ki kyndon ne ki mat ïaleh elekshon jong ki. Kaba mut ba kine ki Party ruh ki leit sha u paidbah ryngkat ba kane ka mat kaba la pynkhih da ka VPP. Te kan don ka jingïapher aiu na kane ka jingdawa jong ka VPP bad ki jingdawa ka UDP bad HSPDP. Ka jingïapher hi ka long ba ka VPP kaba shong ha ka liang pyrshah ka pynkhih ba dei ban review noh, katba ka UDP bad HSPDP kiba don ha ka liang synshar ki sngap man man bad kim ong eiei halor kane ka mat kaba kila khlei ha ka por elekshon.

Leave A Reply

Your email address will not be published.