Khliehriat, Jymmang 3 : Ha ryngkat lang bad ka pyrthei baroh kawei, ha East Jaiñtia Hills District ruh la ïoh ban rakhe ïa ka World No Tobaco Day 2023 bad la ïalap ruh halor ki jingsniew kiba mih na kaba bam duma bad kaba dih duma ne dih sikret, ka phang pdeng jong kane ka sngi ka dei “Ka Meghalaya jong nga kan long kaba laitluid na u duma.
Haba kren ha ka jingïalang, u Deputy Commissioner, East Jaiñtia Hills District, u Abhilash Baranwal, IAS u la ong ba ka jingbam duma bad ka jingdih duma ka long ka lynti sha u drok, kumjuh ruh ka buh jingma kaba lah ban lam sha ki saw tylli jait jingpang kiba ma, kane ka sngi World No Tobaco Day bad ka jingïalap shaphang ka jingsniew u duma kan ïarap ïa ki khynnah skul bad ïa ki paidbah ruh kumjuh ban warah ïa ka jingkylla (behaviour change) ban pynmlien ban pynduna ha kaba bam ïa u duma bad ha kaba dih sikret bad dih duma,
U la pynkynmaw ruh ba mynshem snem kane ka jingrakhe ïa kane ka sngi WNTD campaign ha East Jainytia Hills, ki la don haduh 398 tylli ki skul kiba la pynlong da ki rally bad 312,893 tylli ki signatures la ïoh lum bad palat 24,950 ngut ki khynnah skul ki la ïa shim bynta ha kaba ialap paidbah halor ka jingsniew kaba mih na u duma kumta u la kyntu ïa ki skul ba kin leh ia kine ki rally campaign bad ki signature campaign mynta u snem ruh “Ngi sngew sarong na ka bynta ka jylla bad ngin leh ïa kano kano ban ïada ïa kane ka Meghalaya kaba itynnad ba kan lait na ki jingma ba mih na u duma” ong u Abhilash Banarwal.
Ka State Nodal Officer, National Tobacco Control Program, jong ka tnat ka koit ka khiah, ka Dr. Lana L. Nongbri, ka la ong “ U duma ym tang ba u pyniap ïa ki nongthied, hynrei u pynjulor ruh ïa kiei kiei kiba don sawdong, u dei ruh uba la pyndonkam ban bam bad ban dih da ki briew kiba don haduh 47% ki rangbah bad kito kiba la don 15 snem kyrta shaneng bad wanrah ruh ïa ka jingiap kaba haduh 8,000 ngut ki briew tang hapoh ka jylla Meghalaya kata man la u snem, halor kane ia kane ka sngi ba kyrpang ka World No Tobacco Day 2023 (WNTD’23) campaign la pynbna paidbah naduh ka 22 tarik u ïaïong 2023 ha kaba la kyntu bad bthah ïa ki skul ba kin leh ïa kano kano ka prokram ba kyrpang kum ka jingïaid rally lane ka Signature campaign ban ialap shaphang ki jingsniew ba mih na u duma bad kane ka campaign kan ïarap ruh ban pynlong ïa kano kano ka jaka pule kaba lait na u duma, ïa kane ka prokram Tobacco Free Educational Institutions (ToFEI) la leh ruh hapoh ka jylla naduh u bnai lber jong u snem 2021 ha ryngkat ka jingïatreilang bad ka Sambandh Health Foundation, ka jingialap lane ka campaign kaba la pynlong myn shem snem ka la long kaba jop bad mynta u snem ruh kane ka prokram ai ba kan long kaba jop da ka jingïa shim bynta lang ki ki paidbah lem bad ki khynnah skul bad ki nonghikai.
Ka la ong ruh ba lada ngi dang don ka jingpyrkhat ba ki karkhana shna duma ki long kiba biang na ka bynta ka mariang (environment-friendly lane environment-neutral industry) hynrei ka long kaei kaei pat ka bym iahap bad ka koit ka khiah, haba ngi la tip ba u duma u dei uba ktah bha ïa ka koit ka khiah bad uba wanrah ruh ïa ka jingiap kaba hduh 7 million ngut ki briew ha baroh kawei ka pyrthei bad 13.5 lak ngut tang ha India.
