Nongpoh, Jymmang 03: Ka sorkar Meghalaya lyngba ka tnad ka koit ka khiah ka la shim bynta lang ban rakhe ïa ka World No Tobacco Day kaba la ju rakhe man la u snem ha ka 31 tarik u Jymmang kaba long kaei na ka thong ban pynduhjaid ïa ka jingdih duma ne bam duma kaba ktah ïa ka koit khiah ki paidbah ha ka pyrthei hi baroh kawei.
Kum ka jingïasnoh kti lang ban khanglad na ka jingdih ne bam duma kaba ktah ïa ka koit ka khiah bad bun ki mynsiem ba kordor ki la duh ïa la ka jingim, ka sorkar Meghalaya lyngba ka tnad ka koit ka khiah ka la shim khia ban pynlong syndon da ka jingïalap pyrshah ïa u duma halor ka phang, ‘My Meghalaya, Tobacco Free Meghalaya” ba la plie paidbah ruh lyngba ka Online ha ka 22 tarik u Ïaiong 2023 da ka jingthmu ban pynphriang ïa ka khubor ba ka jingdih ne bam duma ka ktah ha baroh ki liang ïa u briew ne ka briew.
Haba kren ne ai jingpynshai lyngba ka Online ha ka 22 tarik u Ïaiong 2023 ha katei ka sngi ba la pynlait paidbah ban pyntreikam ne shim khia halor ka thong ban ïaleh pyrshah ïa u duma, ka Kong Lana L. Nongbri, kaba dei ka State Nodal Officer, National Tobacco Control Program lyngba ka tnad ka koit ka khiah ka sorkar Meghalaya, ka la ong, “u Duma um pynïap tang ïa kito kiba dih ne bam ïa u duma, hynrei ka wan rah ruh ka jingpynjot ïa ka mariang”.
Ka la ïathuh ruh tang ha ka jylla Meghalaya ki don kumba 47% kiba dih ne bam duma, kata naduh kiba la 15 snem shaneng. Kane ka jingdih ne bam duma ka pynïap ruh kumba 8000 ngut ki briew hapoh ka jylla man la u snem bad lyngba kane ka thong jong ka World No Tobacco Day (WNTD) 2023 la ban khia ruh ban shim khia halor ar tylli ki bynta ban ïalap pyrshah ïa u duma da kaba pynlong ïa ka jingïaid paidbah ban pyrshah ïa u duma bad kawei pat ban pynlong da ka signature campaign kum ka jingpyrshah ïa u duma.
Ka la ïathuh ruh kane ka jingïalap pyrshah ïa u duma ka la sdang naduh u snem 2021 ryngkat ka jingïatrei lang ba ka Sambandh Health Foundation ha kaba ka jingïalap pyrshah ïa u duma ka long ruh kaba jop ha u snem 2022 ba la shim bynta ym tang ki khynnah skul bad ki nonghikai, hynrei ki paidbah nongshong shnong ka jylla hi baroh kawei.
Na ka liang u Deputy Commissioner ka Ri Bhoi, u Arpit Upadhyaya u la ong ba u duma u dei ka lynti ruh ban poi sha ka jingdih drok. U la ong ruh ka jingdih ne bam duma ka don shisha ka jingma kaba khraw bad kaba ïalam ruh ban ioh sha ki saw tylli ki jaid jingpang kiba ym ïa bit satia bad kaba ma (non-communicable diseases.
U la ïathuh ruh ba kane ka World No Tobacco Day ka dei ka jingïalap pyrshah ïa u duma ban ai jinghikai ne pynshai sha baroh ki paidbah ha man la ki shnong ki thaw. Shuh shuh, u la ïathuh ruh ba ha kane ka jingïalap pyrshah ïa u duma ha ki snem ba la leit noh ki la don haduh 885 tylli ki skul kiba la pynlong ïa ka jingïaid paidbah ban ïalap pyrshah ïa u duma bad 512054 ngut kiba la shim bynta ha ka signature campaign ha kaba 57825 ngut ki khynnah skul ki la shim bynta.
