Nongpoh, Jymmang 03: Halor ka jingkhlad ka Samla Walinda Binong ha Rajasthan kum ka Samla Pule na Ri Bhoi District ha ka thaiñ Nongpoh kaba la pynkyndit ïa ki paidbah ka District bad ha ka jylla hi baroh kawei, kaba long ka jingkhlad kaba pher bad kaba suba ba don ei ei sha lyndet, ka Nongpoh Area Women Welfare Association (NAWWA) ka la pynpaw ka jingsngem lem bad ka jingduhnong kaba khraw halor kane ka jingkhlad noh kane ka samla.
Katkum ka kyrwoh ba la phah da ka Nongpoh Area Women Welfare Association ka la phah ïa ka khubor jingsngewlem ïa ki kmie ki kpa, ki hymmen pra, kiba haïing hasem, ki kur ki jaid bad baroh kiba don jingïadei ba kin ioh ïa ka jingpyntngen na U Blei Trai kynrad, ngi duwai ruh ba ka mynsiem jong I (L)Walinda Binong kan poi suk ha dwar U Blei.
Kane ka seng jong ki Longkmie ka thaiñ Nongpoh ki la pynpaw ruh ka jingsngewsih bad ka jingsngewkhia ïa ka jingkhlad ba kyndit jong I Samla Walinda Binong, khun jong u Bah Rubi Binong bad Kong Kobita Syiem, naka shnong Nongagang Marngar, Ri-Bhoi District, kaba leit ban pule haka skul bah Mody University Rajasthan bad ka la long da khongpong ha kaba kane ka jingkhlad ka la ktah shisha ym tang ïa ka ïing ka sem bad ïa ki paidbah ka District bad ka jylla hi baroh kawei.
Katkum ka jingïathuh jong u Kpa jong kane ka Samla la ong ba ka jing khlad jongka ka dei kaba la suba jur ba don eiei sha lyndet kiba la shim jyndat ïaka jingim jong ka khun jong ki haduh ba kan da khlad noh nakane ka pyrthei.
Kumta kum ka seng kaba ju peitngor ïaka jingshong shngain jong ki kynthei ki khynnah, ka kyrpad ïa ki bor ba dei peit ba dei khmieh ba kin shim khia haka ban ïa trei lang bad ka sorkar Rajasthan, na ka bynta ka jingshong shngain jong ki kynthei khynnah bad ruh ba I (L) Walinda Binong (bam kwai ha dwar U Blei) ba in ioh ïa ka hok halor kane ka jingkhlad kaba la wan rah ka jingkyndit kaba khraw ïa baroh.
Ka Seng ka phah ruh ïakane ka jingsngewlem ïa u Kpa, I Kmie, i hynmen ki para ki ba ha iing hasem, ki kur ki jait jong i bad baroh kiba don ka jingïadei bad I, ba kin ioh ïa ka jingpyntngen na U Blei Trai kynrad, ngi duwai ruh ba ka mynsiem jong I (L)Walinda Binong kan poi suk ha dwar U Blei. Kane ka long ka kyrwoh na ki nongïalam ka seng Nongpoh Area Women Welfare Association.
