Nongpoh, Jymmang 03: Shibynta ban dang pynïar bad pynheh ïaka jingtreikam ka seng, ka Hynniewtrep Integrated Territorial Organization (HITO) haka 29 tarik ïaiong hapoh ka jingïalam u Samla Kyrshan Kharnaior Organising Secretary ka seng kmie kila leit ban pynskhem ïaki nongkitkam ba thymmai bad pura jong ka Umden Area.
Ki nongkitkam ba pura jong ka Umden Area bala pynskhem ha katei ka sngi ki kynthup ïa u Boyjohn Sylliang kum u President, Wanshan Khymdeit Secretary, Marius Mallai Vice President, Suresh Syngkli Assistant Secretary, Shngaiñ Syngkli Finance Secretary lem bad 47 ngut ki dkhot bala pynskhem da u Samla Kyrshan Kharnaior haka jingdonkam ki dkhot ka seng na Ri-Bhoi District.
Haba kren ha katei ka sngi naka liang u Samla Kyrshan u la kyntu kynpham ïakitei ki dkhot ba thymmai jong ka seng HITO haka thaiñ Umden ba kin shim ka jingkitkhlieh ban kit ban bah ïaka lyngkor kumba la bynshet haki, ba kin trei hok ïaka kam ban shakri haka thaiñ, ym ban pynjah burom lane ban shim kabu haka kyrteng jong ka seng.
U la ong ruh ba ngi donkam ban kyrshan pura ïano ïano haba ki ïeng ban mih ban ïaleh naka bynta ka jingmyntoi ka jaitbynriew, kala por kala donkam ïaki samla ban mih shakhmat da ka jingstad ban trei ban lur ïaki lyngkha ba sah shrah khamtam ban pynim ïaka jaitbynriew baroh kawei, ula bynrap.
