Shillong, Jymmang 3 : Ha ka 3tarik May 2023 ha ka sien nyngkong ïoh kiew u Bah John F Kharshiing, Chairman, The Grand Council of Chief of Meghalaya, Adviser & Spokesperson, Federation of Khasi States, ha ryngkat ki basan ki longsan bad ki officer na ka tnad Tourism, Ri Bhoi District ki la ïoh ban kiew sha u Lum Nongbah ha uba don ki Mawbynna ki 12 Kur kiba dei ki nongsynshar raid bad ha kaba don ruh ka Law Kyntang ha utei u lum uba heh jong ka Raid Nongtham, Hima Khyrim. Une u lum Nongbah u don ha syndah ka Shnong Pamlaban kaba ha rum Umsohlait, Umsning C&RD, Ri Bhoi District kaba don kumba 76km na Shillong.
Ha katei ka jingkiew ïa utei u lum kumba shi kilometer shiteng (1.5km) ki nongsynshar ka Raid Nongtham ki la ïalam ïa u Bah John F Kharshiing sha ki Mawbynna jong ki kur bad sha ka jaka shad kaba juh don mynbarim bad ruh sha ka Law Kyntang, bad ki la kyrpad ban ïa kren lem ia ka Sorkar ban thaw lad ban ïarap ban pynwandur pynbha dar a katei ka jaka kaba Kyntang bad kaba don ka histori kaba rim bha. La ïathuh ruh ba ha trai u lum la don ruh ki krem kiba kim pat ïoh ban rung lut.
Na ka Liang u Bah John F Kharshiing, Adviser, Federation of Khasi States u la kular ban rah ïa kane ka jingtip sha ki bor jong ka tnad Tourism bad sha u Syiem Khyrim ba kin ïoh ban khmih kumno ban wanrah ïa ka jingïada ïa katei ka jaka ha ryngkat kumno ban wanrah ka jingmyntoi ïa ka Raid bad ïa ki khun ka raid ba kin myntoi na katei ka jingitynad jong katei ka jaka. Utei u Lum Nongbah u long shisha uba itynnad bad uba lah ban khring ïa ki nong wan jngohkai (tourist) Lada ki nongïalam jong ka Raid ki shim khia ban pynkhreh bad pynjanai ïa ki jingdonkam ha kaba khring ïa ki nong wan jngohkai. Na ka Liang ki Rangbah jong ka Raid ki la mynjur ban ïa kren hapoh ka raid kumno ban ïaid shakhmat ban pynbha ïa katei ka jaka kaba Kyntang jong ka Raid Nongtham.
