Mynta yn plie u Myntri Khynnah Kam Pohïing ka Sorkar Pdeng ïa ka kad khaïi ha Dawki

Shillong, Jymmang 03: U Myntri Khynnah ka kam pohïing ka Ri Nityanand Rai, un sa wan plie paidbah ïa ka kad khaïi ne Land Port ha Dawki lashai ka sngi Palei, ban kyntiew ïaka kam khaïi pateng hapdeng ka ri India bad ka ri Bangladesh.
La ïoh jingtip ba u Myntri Khynnah un plie ïa katei ka kad khaïï ha ryngkat ka jingdonlang u Symbud Myntri Rangbah ka jylla u Bah Sniawbhalang Dhar, u High Commissioner ka India sha Bangladesh bad kiwei kiwei ki heh sorkar.
Ka Dawki Land Port ka dei ka project kaba kongsan jong ka sorkar India, kaba ka jingthmu kaba hakhmat eh ka long ban kyntiew ïa ka khaïï pateng hapdeng ka ri India bad Bangladesh.
Kane ka Land Port kaba don ha Dawki kadei kaba hap hapoh ka West Jantia Hills, kaba jngai 55 Km naka District Headquarter, Jowai bad kaba jngai 84 Km naka nongbah Shillong, kaba dei ka nongbah jong ka jylla Meghalaya bad ka jaka jngohkai kaba pawnam ha ka ri India.
Katba ka Land Port jongka ri Bangladesh ka don ha Tamabil, kaba hap ha ka Sylhet District.
Ka Land Port Dawki ka long kaba kongsan namar ba kadei ka shlem ha ka khaïi bad ha ka kit ka bah hapdeng ka ri India bad Bangladesh, ban plie lad ïaka jingkit ïa ki mar ki mata, ki briew bad ki kali.
ïa ka jingtei ïaka Land Port Dawki la ai jingmynjur da ka High Level Empowered Committee (HLEC) jongka Ministry of Home Affairs ha ka 4 tarik u Rymphang 2016 bad latei ïa ka Land Port ha ka jaka kaba don 23 akar.