Ka Dubakh ki kynthei bad SYM ki shynrang kum ki lahduh ha ka 3rd Berchem Cup Basketball Tournament ha Nongpoh

Nongpoh, Ïaiong 30 : Hadien ka jingïaid shaphrang jong ka lympung ïalehkai Basketball bala tip kum ka 3rd Berchem Cup Open to All Basketball Tournament 2023 bala pynlong da ka Seng Samla Nongpoh Proper, katei ka lympung kala poi noh sha kaba kut hadien ba la pynhap pyrda noh ïaka haka sngi Saitjaiñ ha madan ïalehkai ha Sajer.
Ïa katei ka lympung la wan ban pynhap pyrda noh da u Bah Mayral Born Syiem MLA ka Nongpoh kum u kongsan haka jingdonlang u Bah Ferynald K. Kharkamni President KSU NKHD u Bah Luistar Lyngdoh President FKJGP NKHD, u Bah Marcus Marten President HNYF Northern Region, u Samla Lumlang Shylla President Seng Samla Nongpoh, ki nongïalam shnong ki nongïalam raid, lem bad ki paidbah kiba la wan ban ai jingkyrshan ïala ki khynhun.
Haba phai haka jingïakhun phainal ha katei ka sngi, ha ka liang ki kynthei ka Dubakh kala ïa khun pyrshah ïaka SYM bad hapdeng ka jingïakhun ba jur ka Dubakh kala pynliem noh ïaka SYM da 57 la 40 basket kaba la pynlong syndon ïaka Dubakh ban long kum ka lahduh ha katei ka lympung.
Katba ha ka liang ki shynrang ka SYM ka la ïakhun pyrshah ïaka Nongpoh Proper bad haka jingïakhun ka SYM ka la lah ban pynliem noh ïaka Nongpoh Proper da 80 la 56 basket kaba la pynlong syndon ïaka SYM ban long kum ka lahduh ha katei ka lympung.
Ka Dubakh kum ka kynhun laduh haka liang ki kynthei kala ioh ban khur ïaka song pisa ba 25 hajar lem bad ka trophy, katba ka khynun SYM kum ka kynhun ba wan ba ar kala ioh rah ïaka song pisa kaba 10 hajar lem bad ka trophy, haka liang ki shynrang ka kynhun SYM kaba la ioh rah ïaka nam laduh ka la ioh ban khur ïaka song pisa kaba 50 hajar lem bad ka trophy, katba ka Nongpoh Proper ka khynhun ba wan ba ar kala ioh rah ïaka song pisa ba 20 hajar lem bad ka trophy, ryngkat kiwei kiwei ki khusnam shimet bala sam da u kongsan bad ki riew rangbah ha katei ka sngi.