Shillong, Ïaïong 29 : Ka National People’s Party (NPP) ka la byrngem ban phah noh shong ïa ka United Democratic Party (UDP) sha ka Liang Pyrshah hadien ba la dep niew vote ha Sohïong constituency.
Kane ka jingkren ka la mih na u Nongai ktien ka National Peoples Party (NPP) Bah Bajop Pyngrope ha ka jingïalang ïalap elekshon na bynta u kyrtong ka NPP na Sohïong, Bah Samlin Malngiang ha ka jingïalang kaba long ha Rangshken ha kane ka sngi Saitjaiñ.
“Nga ïohsngew bun ki jingkynthoh na ka UDP kiba ong ba hadien ka 13tarik kin pynkylla noh ïa ka sorkar. Kumta u nongai ktien ka NPP, nga ruh nga ong ko UDP ngin pynkylla mangi ruh ha ka 13tarik bad ngin pynshong ïaphi ha ka Liang Pyrshah.”
Lah ruh ban pynkynmaw ba ka jingthep vote ha Sohïong kan long ha ka 10tarik u Jymmang, katba ka jingñiew vote pat kan long ha ka 13tarik u juh u bnai.
Utei u nongïalam ka party u la ong ruh ba ka kam ban long MLA kam dei satia ka kam kaba suk. “Ha kane ka elekshon wat kyrshan da ka jingsngew hynrei kyrshan da ka jingstad ïa ka party kaba don ki MLA haduh 26 ngut bad kaba la don lypa ïa ka sorkar ha kti khnang ban tuid ki kam pynroi ha ka constituency,” u la bynrap biang.
Nalorkata, u la ai ruh ka jingïaroh ïa ka Pynursla constituency kaba la sei ïa u Symbud Myntri Rangbah ka jylla, Bah Prestone Tynsong. “Ha ka por elekshon ha Pynursla constituency ym dei tang ki kyrtong kiba ïaleh elekshon pyrshah ïa u Bah Prestone hynrei ki don bun ki kynhun kiba ïaleh pyrshah hynrei ki paidbah ka Pynursla ki khlem shah pynbiej.”
U ong ruh ba u Bah Prestone u leit tang saw sien shwa ka elekshon ban kynduh ïa ki paidbah hynrei u la tam pat haduh 8 hajar vote. “Nga ngeit ba ka Sohïong constituency hadien ka 13tarik kan dei ka constituency kaba stad kaba jied ïa u MLA ba la trei shitom ha ki san snem ba la dep bad uba la pynbha ïa ki shnong ki thaw kiba la dep ban shah pynpra ha ki por ba la leit.”
Ha kane ka sngi la ïoh ruh ïa ka jingkren na bun ki nongïalam ka party kynthup naduh u MDC ka Mawphlang Bah Lamphrang Blah, MDC ka Sohïong Bah Sherbor Mawlong kumjuh kiwei kiwei.
