Donkam da ki spah klur ban khanglad syndon ïa ka umbah ban tur sha shnong briew

Hiar u Myntri sha Balat ban sakhi dalade

0

Shillong, Ïaïong 29 : Ban ïoh ïa ka jingtip ba paka halor ka jingshah pynjulor ka shnong Balat bad ka shnong Dangar ha ka Wah Umngi, khamtam eh ha ki por lyiur ha kaba da ki spah tylli ki iing ki la hap ban phet noh sha kiwei ki jaka, u myntri sorkar ba peit ïa ka tnad Water Resources, Bah Comingone Ymbon ha ka 28 tarik u ïaïong u la hiar hi lade sha kitei ki shnong na ka bynta ban jurip ïa ka jingshah syllad jong kitei ki shnong.
Ka jingwan u Bah Coming ban jurip kadei lyngba ka jingleit u MLA barim ka Mawsynram, Bah Himalaya M Shangpliang na ka bynta ban buddien ïa ka jingshah bam um ki jaka ha ka wah Umngi. Kawei ruh ka long khnang ba ki paidbah nongshong shnong jong kine ki lai tylli ki shnong kin ym sah ha ka jingsyier ha ka por slap bad halor ka jingdonkam ban leh noh da ka jingïada ba pura ban lait ka jingshah bamduh.
Ïa u Bah Coming la synran lang da u MLA ka Ranikor, Bah Pius Marwein lem bad u Bah Ollan Suin uba dei u MLA ka Mawsynram, katba ki ophisar kiba la poi lang ki kynthup naduh ka Chief Engineer ka tnad Water Resources ka Kong AD Blah, u Superintendent Engineer u Bah L Suting, u Executive Engineer u Bah ML Lawai ba kynthup lang ruh ïa ki ar ngut ki SDO ba kynthup ïa ka Kong B Hynniewta bad u bah WL Nari ha ryngkat bad u Superintendent Engineer ka Brahmaputra Board u Bah N Kharjana.
Na ka liang u Myntri ka tnad Water Resources u la sdang ïa ka jingjurip ha ka shnong Dangar-Dop bad Lalpani kiba hap hapoh ka East Khasi Hills District, ha kaba u la lap ïohi bad sakhi da la ki jong ki khmat ïa ka jingshah rong noh kawei ka surok ka ban leit sha Border Haat bad kumjuh ruh ha ka jaka ap pahara jong ki shispai ïada khappud ki Border Security Force bad kumjuh ruh ka jingshah rong noh ka jaka ker sainar shiah
Hadien jong kane na ka liang u Bah Coming ha ryngkat bad ki MLA lem bad ki ophisar ki la pynlong ruh sa kawei ka jingjurip sa ïa ka shnong Nongdisiar kaba don marjan bad ka shnong Umsawrang ha kaba ka Wah Umngi ka dang sdang ban bam thymmai bad buh jingma ba khraw ïa ki paidbah nong shong shnong. Shuh shuh u myntri u la pynlong ruh ka jingjurip ha ki bynta jong ka shnong Balat ha kaba la sakhi ruh ïa ka jingtrei jong ka Brahmaputra Board kaba la shna na ka bynta ban khanglad ïa ka Wah Umngi ba kan dang ïoh khlong biang ïa ka khyndew.
Na ka liang jong u Bah Comingone Ymbon haba ïa kren, u la ong ba hadien ba u la dep ban jurip u la ïohi ba haduh katno ka Wah Umngi kala pynjot ïa ki shnong ki thaw bad kumjuh ruh ïa ki iing briew. “Ban ai ïa ka jingïada kaba paka donkam da ki spah spah klur tyngka na ka bynta ban khang lad shi syndon na ka jingbam jong ka Wah bad lada shu leh ban ïada tang shi por u la ong ba kan long kumba shu bret kai ïa ka pisa da ki klur tyngka.”
Halor ka jinglap na ka jingjurip u la ong ba un sa pyntip sha u Myntri Rangbah ka Jylla, Conrad K Sangma la sngi Nyngkong ban pyntip sha Myntri ka tnad lWater Resources ba donkam da ki spah klur na ka bynta ban ai ka jingïada kaba pura na jingwan syllad ka umbah.

Leave A Reply

Your email address will not be published.