Shillong, ïaïong, 29: Ki Pulit jong ka Lumdiengjri Police Station ryngkat ka jingsynran lang jong ka kynhun ki Pulit Search and Rescue Team, kynthup ruh ki Pulit ka tnat Special Branch bad na ka tnat Crime Investigation Department (CID) ha ka wat kaba ar ha ka sngi Saitjaiñ ki la hiar sha Pung Umïam ban wad ïa ka wait ba la pyndonkam da ki runar ban daiñ lyngkhot ïa ka met jong u Bah Omega Myrthong.
U Bah Omega Myrthong uba shong basah ha ka shnong Mawlaingut u la shah pynïap ha ki runar ha ka miet jong ka 26 tarik, Rymphang, 2023 harud ka pung Umïam hajan ka Umïam Police Station.
Ka jingleit wad jong ki Pulit ïa ka wait ba la pyndonkam ban dkhat jubor ïa ka jingim jong u Bah Myrthong ka dei lyngba ka jingïalam lynti jong ki briew kiba la shah kem ha ki Pulit ha kaba ki la phla ba hadien ba ki ladep pynïap ïa u Bah Myrthong ki la pda noh ïa ka wait sha um.
Ka jingpyrshang jong ki Pulit ban leit wad ïa kane ka wait ka long hadien ba ki la ap katto katne ka por ba kan da kham hiar ka Pung Umïam. Hynrei kane ka jingpyrshang jong ki Pulit kam shym la seisoh satia wat hadien ba ki Pulit ki la pyrshang ban pyndonkam da ki Metal Detector hynrei kim shym la lap satia.
Ym tang katta, ka kynhun Search and Rescue Team kaba la pyrshang ngam ha um ruh kam shym la lap satia wat hapdeng ka jingpyrshang kaba la neh naduh ka por 10:30 baje mynstep eiei tad haduh ka por kumba 12:45 baje nohsngi.
Kum ban shu pynkynmaw hangne, ki Pulit ka East Khasi Hills ki la kem noh ïa saw ngut ki briew kiba donkti ban pynïap dusmon ïa u Bah Omega Myrthong da kaba mait ïa ka khlieh bad ïa ki dkhot met harud ka pung Umïam.
Katkum ka jingpyntip jong u Superintendent of Police (City) u Bah Vivek Syiem, ïa ki nongpynïap la lah ban ithuh ha kaba lai ngut la ïoh ban kem ha ka 1 tarik Ïaïong, katba uwei la ïoh kem ha ka 2 tarik Ïaïong.
Ïa u Bah Omega, la rahbor da kine ki saw ngut ha ka miet 26 tarik Rymphang bad la pynïap ïa u ha Pomlum View Point bad hadien la mait lyngkhot ïa ka met jong u harud jong ka pung Umïam.
Ki Pulit ki la ïoh kurup ruh ïa ka kali Bolero Pik-up bad ïa ki jaiñ jong u Bah Omega da ka jingïalam lynti jong kine ki briew na Dewsaw Krang bad khlaw Nongpathaw.
U Bah Omega ula jah rngai na la iing naduh ka 26 tarik u Rymphang. Ki Pulit ka Lumdiengjri Police Station ki la register case ïa kane ka jingjah bad ha ka jingwad ki la lap shwa ïa ka khlieh ba la kem pyut ba la suba jur ba ka lah ban dei jong u Bah Omega narud ka Pung Umïam bad ïa ka khlieh jong u la lap ha ka 7 tarik Lber.
Ha ka 8 tarik Lber, ki Pulit ki la ïoh tam sa ïa ki kti na ki artylli ki jaka narud ka pung Umïam bad hadien pat la lap sa ïa ka met ba la tep mar shiteng harud kane ka pung.
Ïa ka metïap hadien ba ladep leh post mortem ha ka 10 tarik Lber ha Civil Hospital, Nongpoh la aiti noh sha ki bahaing hasem ban pyndep ïa ka jinglehniam kaba khatduh bad ïa ki tiar ki tar ba ïoh kurup la phah sha ka FSL, Shillong bad CSFL Kolkata ban pynlong ïa ka jingtohkit.
