Shillong Iaiong 28: U Symbud Myntri Rangbah ka jylla u Bah Prestone Tynsong ha ka sngi Thohdieng, u la lum ïa ka jingïalang bad ki heh Officer bad Engineer ka tnad PWD (Roads & Building) ha Shillong Club bad ïamir jingmut lang halor ki jingeh ha kaba pynïaid shakhmat ïa ki jingtrei jong ki projek bapher bapher ha ka jylla.
“Ngi la shim bun ki ishu ha kaba ïadei bad ka PWD Roads & Building la ka dei ka jingduna haka jingdon ki nongtrei, ka jingeh kaba ngi ïakynduh teng teng ha ka jingduna jong ka pisa ka tyngka, ka jingeh ha kaban pynïaid shakhmat ïa ki projek namar ka jingbym ïoh jaka bad ngi la ïathir bha ruh ha kaba ïadei bad ka jingpyntreikam ïa ka PMGSY bad ïa ki skhim kiba la bei tyngka da ka sorkar pdeng bad ka sorkar jylla ha baroh ar tylli kitei ki tnad sorkar” ong u Bah Prestone Tynsong haba ïakren bad ki nongthoh khubor hadien ba la wai ka jingïalang.
Ula ong, ba ha katei ka jingïalang ki Officer bad ki Engineer ki la ai jingmut ïa kaei kaba bha tam kaba ka sorkar jylla ka dei ban leh na ka bynta ban pynitynnad bad ban pynsuk ïa ki paidbah bad ïa ka jylla baroh kawei.
Ha kaba ïadei bad ka jingud ba ki don ki kontraktor kiba shna torti ïa ki surok bad kitei ki surok kim ju neh slem, u Bah Prestone ula jubab da kaba ong, “Ngi lah ïatai ha kaba ïadei bad ka Quality Control bad ngin buh ïa ki aiñ ki kanun kiban pyrkhing bad kiba khlaiñ bha, khnang ba kino kino ki kontraktor kiba pyntrei ïa kano kano ka kam, ka dei ban long kaba janai bad ba kin pyndep ruh ïa ka kam katkum ka por ba la buh”.
Ha kaba ïadei bad ka jingkhapngiah bad ka jingdheng kali ha ka nongbah Shillong, u Symbud Myntri Rangbah ula ong, “Ka sorkar kan ïaleh ha ka ban pynbun ïa ki Link Road (ka surok ba pynïasoh ïa kawei ka surok bah sha kawei pat) ha ka nongbah Shillong, Jowai bad Tura”.
“Ngi dang ïaid shaid shaid ha ka jingpynkhreh ban shna ïa ki Ring Road (ka surok bypass ba ïaid tawiar ka sor), hynrei ka jingeh kaba mih kam dei satia ba ka sorkar kam ïoh ïa ka pisa hynrei kam ïoh ïa ka jaka. Ngi hap ban ïatai bha ïa kane ka mat, kumno ban pynthikna ba ngin ïoh ïa ki jaka, namar don teng teng ba la pyllait ïa ka pisa na ka bynta ka projek hynrei ki kam ki sahkut noh namar ka jingbym ai jaka ki katto katne ngut” ula bynrap.
