Pyndep u Sordar ka Raid Kongthong ïa ka jinglehniam shwa ban sdang ka shad Puja

0

Shillong, ïaïong, 29: U Sordar ryngkat ki paid nong shong shnong ka Raid Kongthong, ha ka sngi Thohdieng kaba hap ruh ha ka sngi Iew Shyllong la lah ban pyndep ïa ka lehniam leh rukom ban nguh ban dem bad duwai palei ha u Blei Trai Kynrad ne ïa ka puja ka pukon ka jong ki ïa kaba la pynlong hapoh ka madan Niangpyrhai.
Ha ka sngi kaba bud la pynlong pat sa ïa ka shad puja, ba wan ban ïashim bynta da ki paid ka shnong bad kumjuh na ki shnong ba marjan.
Lehse kawei pat ka kyntien kaba kham ñiar ban ïohsngew ne pyndonkam salonsar ha kane ka jylla khamtam lei lei ïa ki paid ba dang bat da ksoh ha ka la niam hok tynrai ka dei ka kyntien ‘puja ne pukon’, kaba haba wad bniah ïa ka daw tynrai ba balei la pyndonkam da kum kane ka kyntien, ki ki nongïakit ïa bah ïa ka shong ka thaw ki pynpaw ba ka daw ka jingpyndonkam ïa kane ka kynhien ka puja ne pukon ka dei namar ba ha ka jinglehniam leh rukom kaba la long hynnin ka sngi, ka ngun ka dem ïa U Blei Trai Kynrad, ka long da ka lynti jong duwai palei, kaba mut ba la shu sei tang da ka kyntien hok u khun bynriew ban shu kyrpad kyrpon beit ha U Blei Trai Kynrad, khlem da leit sha ka shat ka khien ka khnong ka bishar ban ïa khmih ïa ki dak ki shin ne ban leh ïa kano kano ka kñia ka khriam.
Pynban ha shwa ban poi sha kane ka nguh ka dem palei, kumba artaiew shwa jong kane ka nguh ka dem, ka da don dorbar jong ka Raid ha kaba u Sordar, ki Matabor, ki riew tymmen riew san bad ki nongïakit ïa bah ïa ki kam shong kam thaw, ki leit sha ka shat ka khein ka khnong ka bishar, ban pynsgew ban pynsngap bad ban ïa pan hukum na U Blei Trai Kynrad, ban lah ban pyndep ïa kane ka nguh ka dem palei kaba shi sien shi snem.
Haba la biang ka jingïapan ïa ka hukum, kumta ka Dorbar ka shim ïa ka sien jam ban khreh ban pynbna ïar sha la ki paid nong shong shnong ban pyntip ïa ka sngi ka ïa, jong ka nguh ka dem bad ka shad ksiar shad rupa.
Haba phai sha ka nguh ka dem, u Sordar u shim ïa ka bynta ban lam khmat ban shna ïa ka duwan ka dupat da kaba siang da ka lamet, nangta bynrap sa ka ka jingsieh ïa ki lai tylli ki tynsong siej ba la pyndap da ka um bad ha uwei pat u shang, la khleh lang ïa baroh ki symbai ki rynnai, jong ki har rukom ki jingthung jingtep, kaba kum ki paidbah ka shnong, ki juh rep juh riang ïa ki sha la ki bri ki bsah ne lyngkha ki risa ki jong ki.
Ynda haba la dep ban siang ïa ka lamet , u Sordar u shim ïa ka bynta ban pyndep ïa ka jingduwai ka jong u, bad lehse ïoh u don ka tam ka duna ne ka lait ka duna ha ka jingbuh kyntien ha ka jingduwai, la ïarap shuh shuh ïa u sordar da kaba pasiaw na kiwei pat ki para riew Rangbah ne riew tymmen riew san ka shnong.
Haba la biang lut ka ka kyntien ka nia ka jutang, la but lang ïa baroh ki symbai ki rynai halor jong ka lamet bad ruh ban da suid ruh ïa ka um na ki tyndong siej bad hadien kane, u sordar u la sa khylliap ïa kine baroh ban tyrsat ha khrum jong uwei u maw ba don ha madan Niangpyrhai ba dei ka jaka lehniam.
Marsien dep ka nguh ka dem na u sordar, la dei pat ka pali ban ïa shad paidbah, ha kaba la tem ïa ka ksing kynthei bad ban shoh ïa ka sur ka ksing padiah ha ka siej, hangne naduh ki khynnah rit haduh ba la san la rangbah kynthei bad shynrang ki ïashim bynta shit rhem ban ïa shad ïa kynthih pyllun pyllun ïa ka madan.
Kane ka nguh ka dem ka long artad kum shi bynta ban ïapan bad kyrpad ha U Blei Trai Kynrad ba u n theh sei ïa la ka kyrkhu ka kyrdoh ïa u khun bynriew ban san ban plung u symbai u rynai ban dap ban pahuh ka bam ka dih, ban ïoh ïa ka koit ka khiah, ban ïa roi ha ka liang kamai ka kajih ban ïoh ïa ka shait ka khiah krad khiah stang, ban roi ka jingnang jingtip, ryngkat ba U Blei Trai Kynrad un da ri da sumar sukher, ba ïoh don ka sabuit ka sakai ka sawbniat sawtyngam, u nongshun u nongpen bad ba baroh ka sniew ka smeh, kin da shah khalah shaba sep jong kasngi bad ka shnong ka thaw kan ïoh tang da ka shongsuk ka shongsain ka im hok im suk bad im palei.

Leave A Reply

Your email address will not be published.