ïoh pdiang u Dr R.S Thangkhiew ïa ka Distinquished Career Award

0

Shillong, Iaiong 29 : U Nongseng, u Managing Director bad Chief Gastroenterologist jongka Supercare Hospital, Shillong u Dr Rangksan Sing Thangkhiew u la ïoh pdiang ïa ka khusnam Distinguished Career Award ha ka jingïalang ba heh jongka Northeast Healthcare Summit 2023 kaba la long ha Radisson Blue Hotel Guwahati ha ka 28 tarik mynta u bnai.
Kane ka Summit ka dei kawei na ki rynsan ba paw nam ban ithuh bad ai mynsiem ïa kito kiba la trei met ban mynsiem ban kyntiew ïa ka koit ka khiah ha kane ka thaiñ shatei lam mihngi ka ri India. Ki Kongsan ha kane ka jingïalang u long u Keshav Mahanta, myntri ka tnad ka koit ka khiah jongka sorkar Assam bad Dr Sapam Ranjan Singh myntri ka koit ka khiah jongka Manipur.
Ka jingïakynduh ba nyngkong jongka Summit ka long ha u snem 2019 bad mynta la saw snem la pynlong ïa kane ka jingïalang ban leh burom ïa kito kiba kyntiew ïa ka koit ka khiah ha kane ka thaiñ. Ka long ka sien ba nyngkong eh ba mynta u snem ha kane ka Summit la khot ban ïadon lang da baroh ki hynniew tylli ki jylla kane ka thaiñ kynthup ruh ïa ka Sikkim.
Kane ka summit ka long ban ithuh ïa ka jingtrei shitom, len lade bad aiti lut jong ki seng ne riew shimet ban kyntiew ïa ka koit ka khiah ha kane ka thaiñ hi baroh kawei.
U Dr Thangkhiew u la ïoh ïa kane ka khusnam namar ka jingaiti lut jongu ban lam lynti ban kyntiew ïa ka koit ka khiah ha Meghalaya bad ka thaiñ hi baroh kawei. U Dr Thangkhiew ula pyndep ïa ka MBBS na Assam Medical College ha u snem 1980 bad MD (Medicine) na PGIMER Chandigarh ha u snem 1985. U dei u Super Specialist ba nyngkong eh ha ka Gastroenterology ha kane ka thaiñ shatei lam mihngi bad u la pyndep ïa ka DM (Gastro) ha u snem 1987 na PGIMER, Chandigarh. U dei ruh u doktor ba nyngkong eh ha kane ka thaiñ ban sumar ia ka ERCP ( Endoscopic Retrograde Cholangiopancreatography) kaba dei ka rukom sumar ban kynthup lang iaka Endoscopy bad X-rays
bad ban sumar ïa ki jingpang ba bunjait.

Leave A Reply

Your email address will not be published.