Lahduh ka St. Anthony’s Higher Secondary School ïa ka Chief Minister District Level Inter School Athletic Meet, 2023 ka EKHD

Shillong, Ïaïong 30 : Ka St. Anthony’s Higher Secondary School, Laitumkhrah ka la ïoh rah ïa ka nam kum ka lahduh ha ka lympung jingïalehkai kaba la tip kum ka Chief Minister District Level Inter School Athletic Meet, 2023 ba la pynïaid da ka ophis u Block Development Officer jong ka East Khasi Hills District.
Ka St. Mary’s Higher Secondary School, Laitumkhrah ka jop ha ka kyrdan ba ar bad ka H.Elias Higher Secondary School, Nongthymmai ha ka kyrdan kaba lai.
Ha katei ka lympung kaba lai sngi lynter kaba la sdang ha ka 26 tarik bad kaba la kut noh ha ka 28 tarik Ïaïong 2023 ha SAI, STC, Shillong la wan ban pynhap pyrda noh da u Assistant Director jong ka SAI, STC, Shillong, u Tiranta Chavan uba la long kum u kongsan ha ka jingdonlang u Bah P.B War Nongbri, uba dei u Assistant Director, jong ka Directorate of Sports & Youth Affairs, u DSO ka EKHD nalor kiwei kiwei ki officer jong ka tnad Sports.
Ka St. Anthony’s Higer Secondary School ka la ïoh rah nam lahduh hadien ba ka la ïoh ban khur haduh 33 tylli ki takma ba kynthup 15 tylli ki takma Ksiar, mar 9 tylli ki takma Rupa bad takma Rnong.
Ka St. Mary’s Higher Secondary School kaba wan ba ar ka ïoh ban khur 19 tylli, 8 ki takma Ksiar, 3 tylli ki takma Rupa bad 8 tylli ki takma Rnong katba ka H.Elias Higher Secondary School, Nongthymmai kaba wan ha ka kyrdan kaba lai ka ïoh khur 6 tylli ki takma ba kynthup 4 tylli ki takma Ksiar bad 2 ki takma Rnong.
Ha kaba kut jong ka jingïalehkai la sam ïa ki trophy ba kynthup naduh ka trophy nam lahduh haduh ki khusnam shimet.
Ha ka U-14 (Boys) ïa ka nam Best Athlete la ïoh rah da u Wedan Jachugrik B Marak jong ka St. Anthony’s Higher Sec School, Laitumkhrah ha ka jingmareh ba 60m da kaba khur 554 point bad ka Alethea C. L. Nongpiur kaba dei jong ka Loreto Convent, Laitumkhrah ha ka liang ki kynthei da kaba khur 613 point.
Ha ka U-19 (Boys) la ïoh da u Embhahlang Lyngdoh jong ka St. Anthony’s Higher Sec School, Laitumkhrah ha ka jingïakob mareh ba100m bad khur 704 point bad ha ka liang ki kynthei la ïoh rah da ka Chitra Malik jong ka St. Mary’s Higher Sec School, Laitumkhrah kaba khur 657 point.
Ha ka U-18 (Boys) ïa ka nam Best Athlete la ïoh rah da u Renaldi Dhar jong ka H.Elias Higher Sec School, Nongthymmai ha ka jingïakob mareh ba100m da kaba khur 718 point bad ha ka liang ki kynthei la ïoh rah da ka Anrisha Klein jong ka O.M Roy Memorial Higher Sec School, Mawlai Kynton Massar ha ka jingïalehkai High Jump bad khur 687 point.
Ha katei ka lympung ba lai sngi, la ïoh ban pynlong ïa kiba bun jait ki jingïalehkai kum ka 100m, Long Jump, Shot Put, High Jump, Javelin, Hexathlon nalor kiwei kiwei.
Ha kane ka lympung ïalehkai ba mynta u snem ki don 1050 ngut ki khynnah kiba ïashim bynta ba kynthup shynrang bad kynthei na ki 37 tylli ki skul.
U Kongsan haba ai jingkren ha kane ka sngi u la ai mynsiem ïa baroh ki khynnah skul kiba la ïashim bynta da kaba ong ruh ba baroh ki la long ki nongjop kiba ïashim bynta ha ki District Level.
Kum ban pynkynmaw hangne ba ïa ka Chief Minister District Level Inter School Athletic Meet, 2023 la plie pyrda da u Deputy Commissioner jong ka East Khasi Hills District, u S.C Sadhu (I.A.S) ha ka jingsakhi lang u District Sports Officer ka East Khasi Hills District, u Bah O. Mawthoh nalor kiwei kiwei.