Ka BJP da kam jop bun ki MLA kan shu thied ïa ki MLA ban thaw Sorkar

Shillong, K’lyngkot 13: U nongïalam ka Congress uba dei ruh u MP sha ka Rajya Sabha u Mukul B Wasnik ha ka sngi Thohdieng u la ther tyngeh ïa ka BJP namar ka jingpynjngut jong ka ïa ka saiñ hima sima bad ka kam synshar paidbah ha ka ri.
Haba kren sha ki lad pathai khubor hadien ba la wai ka jingïalang bad ki kyrtong bad ki nongïalam ka party ban ïakren halor ka jingpynkhreh ka party ïa ka elekshon MLA ban sa long shen, u Mukul Wasnik u la ong ba ka BJP ka pynjngut ïa ka saiñ hima bad ka synshar paidbah ha kaba lada kam lah ban jop bun ngut ki MLA ban ïoh thaw sorkar ka ju pyndonkam da ka bor pisa ban thied ïa ki MLA kiba jop na kiwei pat ki party ban pynïasnoh sha ka.
“Ka BJP ym tang ba ka thied ïa ki MLA hynrei ka pyntieng pynsmiej ïa kito ki MLA na kiwei pat ki party da ki buit sianti khyllah jong ka ban pynbor ïa ki MLA ban leit noh bad ka bad kane phin ïohi kumno ha Arunachal Pradesh ha kaba uwei u briew ha ki san bnai u shim jingsmai lai sien kum u Myntri Rangbah na ki lai tylli ki party kiba pher bapher tang hapoh ka san bnai bad kane ka jia namar ka buit poh ba ka BJP ka leh,” u la ong.
“Kaei kaba ka BJP ka leh kumba la jia ha Manipur, Goa, Uttarakhand, Rajasthan, Madhya Pradesh bad kiwei ki jylla ka la pynjngut haduh katta katta ïa ka synshar paidbah ha ka ri, bad nga i tirem ïoh kane kan jia ha kane ka jylla ruh,” u la bynrap.