Da ka app lah ban shondur ne ring video ban ujor ïa kiba sam pisa por elekshon
Ki Kyrtong ba don dak sniew kin hap pynbna ha kot Khubor haduh 3 sien
Shillong, K’lyngkot 13: U Chief Election Commissioner jong ka ri India, u Rajiv Kumar, u la ong ba ka Election Commission kum ka jingïaleh tyngeh ban wanrah ïa ka elekshon kaba khuid ba suba, ka la shna da kawei ka app, ba la tip kum ka C-Vigil ha kaba ki paidbah kiba la lap ne ïohi ïa ki briew kiba sam pisa ki lah ban shondur ne ring video bad ki lah ban phah shah ka Commission lyngba kane ka app.
Haba ïakren ba ki nongthoh khubor ha Shillong hadien ka jingïakynduh bad ki nongïalam jong ki Party, ki bor sorkar bad ki bor Pulit bad bor syntiat, u Kumar, u la ong ba lyngba kane ka app, ki paidbah ki lah ruh ban shon dur ne ban ring ïa kino ki jingleh bym dei jong ki Kyrtong ne jong ki Party bad ban phah beit lyngba kane ka app.
“Lyngba kane ka app, ngin ïaleh pyrshah ïa kino kino ki kam beaiñ ha ka por elekshon”, la ong u Kumar, da kaba bynrap ruh ba ki bor ne ki ophisar ba peit bad pynïaid ïa ka elekshon tang hapoh shi bynta ba ki ïoh ïa ka jingujor ki la lah ban poi sha ka jaka ba jia.
Shuh shuh u la ong ba ka Commission, ka la buh ruh ki kyndon ba kino kino ki kyrtong kiba don ki Criminal Record ne ki kiba la shah pynngat case ki ban ban pyntip ha ki lad khubor haduh lasien laiwat ïa kita ki kam jong ki. Hadien ladep pynmih kumne, kin hap ban pynshai ïa kita ki kam. Nalorkata ki Party ba ki ïeng ruh kin hap ban pynshai lang ïa kane ka kam ba ki leh.
Haba la kylli na ka liang ka Commission kan leh pat kumno lada jia ba kine ki kyrtong ne ki Party kim pynshai ha ki lad pathai khubor, u Kumar u la ba kiba bun ki kyrtong ki ju pynmih kumba la bthah, hynrei lada kim lah ban leh kumta, na ka liang ka Election Commission ka don la ki jong ki kyndon ban pyntreikam.
Haba la kylli halor ka jingkular skhim da ka pisa da ki katto katne ki Political Party shuwa ka elekshon, u Kumar, u la ong ba ki Party ki don ka hok ban kular shuwa ka elekshon, namar ki kyndon ki shah ïa kane. Nangta ki paidbah ruh ki don ka hok ban tip ïa kine ki jingkular. Tangba ka shong pat ha ki paidbah ba ki sngewthuh haudh katno kine ki jingkular ki lah ban treikam.