Jynrat ka Assam ïa ka Signboard pung dohkha ha Maikhuli, khang ïa ka project ka Water Resource ha Hawla

Nongpoh, Lber 24: U MLA ka Jirang Constituency Bah Sosthenes Sohtun u la pyntip sha u Myntri Rangbah ka jylla Conrad K. Sangma halor ka jingpynpra jong ka Sorkar Assam ïa ka Signboard jong ka pung ri dohkha ha ka shnong Maikhuli bad ka jingwan khang ki Pulit Assam ban pyntrei ïa ka project jong ka tnad Water Resource ha ka shnong Hawla kaba hap ha ki jaka khappud ka Meghalaya bad Assam.
U Bah Sohtun u la bthah ruh ïa u Deputy Commissioner ka Ribhoi u Arpit Upadhyay bad ia u Superintendent of Police u Jagpal Singh Dhanoa ban leit jurip ïa ka shnong Hawla hadien ba kum u MLA ha ka sngi Saitjain u la hiar jurip ïa ka shnong Hawla ba ka Assam ka la khang ban pyntrei ïa ka project jong ka tnad Water Resource.
Ha ka sngi u Blei u Bah Sohtun la leit ban juip ïa ka shnong Maikhuli ba ki Pulit ka Assam ki la pynpra ïa ka Signboard ka pung ri dohkha.
Kum ban pyntip hangne, ka projek ha ka shnong Hawla ka dei kaba pyntrei da ka tnad Water Resource na Ri Bhoi bad ka rung ri dohkha ba la pynpra da ka Assam ïa ka Signboard ka dei kaba la pyntrei lyngba ka skhim MGNREGS ha ka shnong Maikhuli.
Ha ka jingiakren bad ki lad pathai khubor hadien ka jingjurip ïa ki ar tylli ki jaka ba ka Assam ka la pyrshah ïa ki kam pynroi ba la wanrah da ka Sorkar Meghalaya, u Bah Sohtun u la ong, “kum u nongmihkhmat paidbah ka Jirang Constiteuncy u pynrem jur ïa ki ki kam thombor jong ka Sorkar Assam ha kaba watla ki la tip ba ka jingïapynbeit pud hapdeng ka Assam bad ka Meghalaya ka dang ïaid shaphrang, hynrei kim salia.”
U la ong ruh ba kum u MLA u la shimkhia ïa kane ka kam ban pyntip sha u Myntri Rangbah ka jylla u Conrad K. Sangma ba un ïakren bad u Myntri Rangbah ka Sorkar Assam u Himanta Biswa Sarma bad ha kajuh ka por ruh u ladep ban bthah ïa u Deputy Commissioner bad ia u Superintendent of Police ka Ri Bhoi ba kin phah ïa ki Magistrate bad ia ki bor Pulit ban leit jurip bad kumba la ïakren u Deputy Commissioner jong ka Kamrup District u la kular ban phah shna biang ïa ka Signboard ha Maikhuli bad u la bthah pat ïa ki bor synshar district ba kin phah shna biang lyngba ka ophis u Block Development Officer (BDO) ka Umling C&RD Block khnang ban pynskhem ïa ka jinglong trai ïa ka jaka ha Maikhuli.
Ha kawei ka bynta u la ai ka jingïaroh ruh ia ki nongshong shnong jong ka Maikhuli kiba la ïakhun pyrshah ïa ka jingwan pynpra ki Pulit ka Jylla Assam ïa ka Signboard bad kane ka jingshlur jong ki naduh ki longkpa, ki longkmie bad ki samla ka long ruh shi bynta ban ïada ïa ka khyndew ka shyiap jong ka jylla.
“Kum u nongmihkhmat paidbah nga kyrmen skhem ba u Myntri Rangbah ka jylla un shimkhia ïa kane ka kam ban ïakren halor kane ka jingwan pynpra ïa ka Signboard bad ruh ïa ka jingpynsangeh ban pyntrei ïa ka project ka tnad Warter Resource ha Hawla khnang ba ki kam pynroi ba dei ban ioh jingmyntoi sha ki paidbah kan ïaid beit ïaid ryntih,” la bynrap u Bah Sohtun.