Shillong, Lber, 24: Uwei u heprit uba dang 7 snem ka rta u khun jong ka Kong Bandari Shangpliang u la mynsaw jur namar ka jingleh torti jong ka Meghalaya Energy Corporation Limited (MeECL) kaba la shu ieh khongreng ïa ka jaka ba la buh ïa u Transformer khlem ka jingker ha ka shnong Lempluh, Nongspung Syiemship.
Kane ka la jia ha ka 13 tarik mynta u bnai katba une u heprit u dang mih ban ïalehkai hajan une u Transformer.
Halor kane ka jingjia, ka KSU Nongspung Circle ka la leit sha kane ka shnong bad noh synniang ïa u khun jong ka Bandari Shangpliang kum ka jingïarap.
“Nga dang don ha ing bad nga la phah leit lehkai ïa u khun shabar, katba nga dang sait tiar nga shu ïoh sngew kynsan ïa ka jingbthei. Mar mar nga la mih shabar nga lap pynban ba u khun u la thiah lyndang ha madan bad ha ka por ba nga la leit shim ïa u, ka bording ka la bret ïa nga. Nga la pyrta jingïarap bad mar kumta la wan mih sa ki paramarjan ban ai jingïarap ïa u khun jong nga,” la ong ka Kong Bandari.
Na ka jingshah bat ha ka bording, une u heprit u la mynsaw na ki bynta jong ki shympriah kti, shympriah kjat bad na ki bynta jong ka shadem.
Ki nongïalam ka KSU ki la ong ba une u heprit u la mynsaw jur bad nalor ba u dei ruh na ka longing kaba kham duk kham kyrduh.
“Ngi kyrpad ïa ka Sorkar khamtam ïa ka MeECL ban leh eiei namarba kane ka kam ïap kam im bad ba une u heprit lyngba ka jingïarap jong ka sorkar un ïoh ïa ka met kaba koit kaba khiah,” la ong ki nongïalam ka KSU.
Ki la ong ruh ba ka seng ka la lap ruh ba kiba bun ki Transformer kiba don marjan bad shnong Lempluh ki dei ki bym ker saiñar satia bad ym shym la buh bha ban ïada ïa ka ïaid ka ieng jong ki paidbah bad la shu pyllait lyngkrang.
“Ngi kyntu ïa ka Sorkar ba kan shimkhia ba kan ym jia shuh kum kine ki jingjia. Manla u bnai haba wan ka Bill thang bording, ngi siew bad ngi pynbiang hynrei balei haba don kum kine ki jingjia ki khein sting bad ki shim sting kim don kano kano ka jingsuidniew bad kim pyrkhat ïa ki mynsiem jong ki parabriew,” ki la ong.
