Hato ka VPP kam dei mo kawei na kita kiwei pat ki seng Tit? kylli u Bah Sniawbhalang Dhar

Shillong, Lber 24: U National General Secretary ka National People’s Party (NPP) bad u Symbud Myntri Rangbah ka jylla u Bah Sniawbhalang Dhar u la pynrem ïa u President jong ka seng Voice of the People’s Party (VPP) u Bah Ardent Miller Basaïawmoit ba u la kylla long uba shet kylla ne uba kyntiap na kawei ka seng sha kawei pat (‘turncoat’).
Haba kren ha ka jingïalang ïalap ilekshon kaba la long ha ka Nartiang konstituensi ha kaba haduh 9 tylli ki shnong ki la wan ban ïashim bynta, u Bah Dhar u la ong ba mynshwa u Bah Ardent u la shait don hapoh ka seng United Democratic Party (UDP) bad hadien u la pynïasoh bad ka Hill State People Democratic Party (HSPDP), ha kaba u la bat ruh kum u president.
U la ong ba mynshwa u la iehnoh ïa ka HSPDP bad u la leit kyrshan ïa ka Congress da kaba kynnoh ba ki seng riewlum ki la roi bun palat la kum ki tit hapoh ka jylla Meghalaya.
“Hynrei nga kwah ban kylli ïa u, hato ka VPP kam dei mo kawei na kita kiwei pat ki seng Tit? U la ïalap na ka bynta ban wanrah ka jingkylla hynrei u la kut pat ïalade ban phet kylla na kawei ka party sha kawei pat. Um ïapher eiei hynrei u dei u nongshet kylla bad uba shu phet na kawei ka seng sha kawei pat (turncoat),” ong u Bah Dhar.
U la kyntu ïa ki paidbah ka ri Khasi bad Jaiñtia Hills ba kim dei ban shah pynbeij ha kum kine ki nongïalam saiñ pyrthei.
Haba pynshai ïa kiba bun ki kam pynroi kiba la leh hapoh ka jingïalam ïa ka sorkar da ka NPP ha kine ki 6 snem ba la leit, u Bah Dhar u la kyntu ban vote ïa ka NPP na Shillong parliamentary constituency.
Ha ka jingïalang la donlang u CEM ka JHADC u Bah Thombor Shiwat bad kiwei pat ki nongïalam ka party bad ki nongtrei ka seng NPP.