Nongpoh, Kyllalyngkot 09: katba dang mih ki sngi bad ki por ka jingma kaba ap mynta ïa ki khun samla ka dei na ka jingktah jong u drok, ha kaba bun ki khun samla ym tang ha ki jaka sor, hynrei wat ha ki shnong nongkyndong u drok u la sdang ban buh khlieh bad kaei kaba ktah ka long ïa ka ing ka sem bad ki kmie ki kpa.
Kumba la ioh lum jingtip da u Mawphor, ha kine ki sngi ba mynta ka la don ka jingkynnoh ba ki kam tuh ki kam thiem ki la dang kynrei ha ka thaiñ Nongpoh bad ïa kane la suba ka dei ka jingdon kti jong kito ki samla kiba la ngop ha u drok.
Dang ha kine ki sngi la ioh jingtip ba wat ki khun sniang ba la ri ha sem, ki nongtuh ki la wan tuh bad rong tuh bad ym tang katta ki nongtuh ki tuh lut ïa baroh ki jaid tiar naduh ki Motor um, ki solar bad kiwei kiwei ki tiar ha kaba ïa kane la pynpaw da kiba bun ki paidbah ba ka kam tuh ka la jur bha ha kane ka thain Nongpoh.
Haba la ioh ban ïa kren bad katto katne ki riew rangbah, ki la pynpaw ïa ka jingsngewkhia ha kaba kane ka kam tuh ka la dang kynrei kat dang mih ki sngi bad ki la pynpaw ruh ba kane ka kam tuh ka lah ban dei kito ki khynnah dih drok ha kaba ki ju tuh lut ïa ki tiar ki tar na ki ing ki sem lada kum ki longing kim peitngor ïa kine ki khynnah dih drok.
Shuh shuh, la ong ruh ba tang ban ioh ban dih drok kitei ki khynah kim banse ban tuh ban thiem na ka bynta ban ioh thied drok bad kane ka paw shai ruh la jan bun jaka ki ju ioh bat ïa ki khynnah ba dih drok ha kaba kane la suba ba kim banse ban tuh ban thiem tang ban ioh dih drok.