Hiar ka HBDRF sha ki shnong ba kyndong tam jong ka Block-1

Jowai, K’Lyngkot 09: Ka Hynñiewtrep Border Disputed Redressal Forum (HBDRF) ha kane ka 6 tarik jong u Kyllalyngkot ka la thom ïaki riat ki ram ki rai eh raidam bad leit hiar shaduh shaki shnong kiba kyndong tam kiba don hapoh Elaka Labang Nangphyllut bala tip kum ka Block-1 kiba kynthup ïa ka shnong Moorap Mooriap Syrlong Laher Umsalait Mynju Mookhim Bandeiñ Mooknor Khyndeliar Madan myn-i bad Mynriah.
Kine ki shnong kidei kiba kyndong tam kiba duk tam bad kiba sahdien tam naba roh ki shnong kiba shong basah daki jait bynriew Khasi Pnar. Ki shnong ki bym pat don ïew don hat boarding, umbam umdih, surok lynti syngkieng skul jaka sumar pang bad kino kino ki kynja kam pynroi Development.
Ka jingleit jngoh bad pynlong jingïalang jong ka Forum sha kine ki shnong ka long ban pynsngewthuh ïaki shaphang ka nongrim bad ka jingshisha halor ka jingdawa jong ki ban re-transfer biang ïa kane ka thaiñ sha Meghalaya. Ban pynshlur bad aibor ai mynsiem ïaki ba kin long kiba ïaineh bad ïaishah haka jingïaid lynti jong kane ka kam, ban wanrah ïaka jingsngew ïajuh ïajan hapdeng ki paid Khasi Pnar. “Lada ngi don ha ei ei, ka jaitbynriew dei tang kawei”.
Ïaka jingïalang la pynïaid da i kong Purity Phawa secretary jong ka Forum, la ïoh ïaka jingkren da u Chandame Sungoh Chairman jong ka Forum, Bah Thomas Passah Senior Spoke – Person, bad naki riew rangbah jong kane ka thaiñ u Phrit War bad u Tuner Lyngdoh. La ïoh ruh ban sam bad ai sngewbha daki jaiñ shaki ne ki nongshong shnong jong kane ka thaiñ ïa kaba la ai ban synñiang sngewbha daki katto katne ngut ki paralok badon mynsiem.
Ki pait nongshong shnong jong ka ne ka thaiñ kila pynpaw ïaka jingkwah jingthrang bad jingkut jingmut ban don beit sha Meghalaya kumba juh long naduh hyndai hynthai kulong kumah. Kila hun bad kut jingmut ban ym pdiang shuh ïa kino kino ki Grand ki Scheme na ka Sorkar Assam kat bym pat tikna u pud u sam wat lada ka wan daka ba phon ba pah lane daka pynbor, kila kyrpad ruh ïaka Sorkar Meghalaya ban pyndep kloi ïa kane ka kam pynbeit pud khnang ba kan ïaid beit ka synshar khadar ban ban wanrah ïaka shongsuk shong saiñ, ka roi ka par.
Ki nongkren naka Forum ki pynpaw ka jingsngewkhia kaba jur halor kane ka jingeh kaba khrawtam baki paradoh parasnam kiba shong basah sha kine ki thaiñ ki ïakynduh bad kular ruh ban ym iehnoh ïaki la haka no kano ka por lane laha kano kano ka jingeh jingdonkam baki ïa kynduh.