Jop ka Inningstars Laitumkhrah bad ka Dynamite ha ka Shillong Cricket Association Cricket League Third Division

Shillong, Kyllalyngkot 23: Ka Inningstars Laitumkhrah ryngkat bad ka Dynamite CC ki la ïoh ban khur jingjop ha ki ar tylli ki jingïalehkai ka lympung Shillong Cricket League Third Division 2024-25 ba la pynhïaid da ka Shillong Cricket Association ha madan Urkaliar, Shillong. Ka Lait-umkhrah ka la lah ban pynliem da 7 wiket ïa ka Sawmer CC katba ka Dynamite ka la jop da 23 ron ïa ka Matador CC.
Haba phai sha ka jing-ïalehkai kaba nyngkong ka Sawmer ka la shimti ban tied nyngkong hadien ba jop ïa ka toss hynrei ka la shah khanglad noh da tang 100 ron naba shah pynkhyllem baroh 10 wiket naki 17.3over.
Na ka liang ki nongtied u Mebanshan Kharsati u la lah ban kamai 32 ron naki 26 bol, nangta u Dakerlang Basaiaw-moit u la tied 15 ron naki 11 bol. U Asif Khan u la long u ba seisoh tam napdeng ki rang-kawangbol ka Laitumkhrah ha kaba u la khur 5 wiket naki 4 over bad shah tied tang 27 ron, katba u Akash Kumar u la khur 4 wiket naki 4 over bad shah tied 23 ron.
Haba jubab ka Inningstars Laitumkhrah ka la pyndep ban kynjoh 103 ron da kaba hap tang 3 wiket naki 14.3 over. Na ka liang jong u Badap Tynsong (4 over: shah tied 20 ron) bad u Sdangroibor Nongsiej (1 over: shah tied 2 ron) ki la ïoh ban khur 1 wiket.
U Akash Kumar u la tied 44 ron naki 36 bol katba u Varun Gill u la kamai 23 ron naki 23 bol kaba la ïarap ïa ka kynhun ban jop da 7 wiket. Ka nam Player of the match la khur da u Akash Kumar u ba la kamai 44 ron bad khur 4 wiket.
Ha ka jingïalehkai kaba bud ka Matador CC ka la rai ban phah tied nyngkong ïa ka Dynamite hadien ba jop ïa ka toss, bad na ka liang jong ka Dynamite ka la lah ban tied 201 ron, hap 10 wiket naki 18.1 over. U Vickey Sharma (63 ron naki 31 bol) bad u Abhijit Roy (30 ron naki 18 bol) ki la long kiba seisoh tam ha ka tied na bynta ka Dynamite CC.
Haba phai sha ki rang-kawangbol ka liang pyrshah u Mebanteiskhem Syiemiong u la khur 4 wiket naki 3 over bad shah tied 43 on, nangta u Rup thapa u la khur 3 wiket naki 3.1 over bad shah tied 24 ron.
Haba pyrshang ban beh ïa katei ka thong ka Matador CC ka la ïohlad ban kynjoh tang 178 ron, hap 5 wiket haduh kaba kut jong ka 20 over ba la mang. U Rup Thapa u la kamai 107 ron naki 63 bol, katba u Mebanteiskhen Syiemiong u la kamai 25 ron naki 23 bol hynrei watla kata ruh kam shym la biang ban pyllait ïa ka kynhun na ka namrem.
Na ka liang ki rang-kawangbol ka liang pyrshah u Ayush Ray (4 over: shah tied 40 ron: khur 2 wiket) bad u Mukesh Rai (4 over: shah tied 17 ron: khur 1 wicket). Ka Dynamite ka la jop ïa ka jingïalehkai da 23 ron bad ïa ka nam Player of the match la khur da u Vickey Sharma u ba la tied 63 ron.