Shillong, Lber 10: Ka Riwar Mihngi Football Assocïation hynnin ka Sngi Saitjaiñ (9 tarik Lber) ka la jied ïa ki nongkitkam (Office Bearers) kiba pura na bynta ka samoi treikam 2024-27 lyngba ka Election ba la pynlong ha Ing Dorbar Shnong -Urksew Wahpathaw ha ka por 11 baje mynstep.
Ïa kane ka Election jied nongkitkam la pynïaid da Election Committee jong ka synjuk Riwar Mihngi Football Assocïation bala ïalam da I bah Wanhun Massar kum u chairman ha ryngkat u Bah Summit Massar, kiba la juh long teng ki nongïalam ha ka imlang ka sahlang jong kane ka thaiñ Riwar Mihngi.
Ka jingpynlong ban jied nongkitkam ka la ïaid katkum ki kyndon riti treikam ka Assocïation. La wan ïashim bynta da baroh 16 (Khathynriew) tylli ki sports Club. Football club ba la pynïasnoh bad ka Assocïation (affilïated). La pynshongkun shuh shuh ïa katei ka jingjied nongkitkam da ki pyrman (Observer) na ka Meghalaya Football Assocïation kiba Kynthup ïa u Bah Sunesh Syiem bad u Bah Dipshon Ryntathïang ki la wan ban sakhi lang bad ban pynshisha ba ka long kaba bit ba bïang bad ïaid beit ïa ka Election kat kum ki kyndon treikam ka Meghalaya Football Assocïation.
Ki dkhot nongkitkam kiba la shah thung na bynta ka samoi treikam 2024-27 ki long: President: Bah Iengskhem Diengdoh, Vice President: Bah Largest LAso, General Secretary: Bah A. Dapborlang Kharbudon, Asst. General Secretary: Bah Kitdor Khongsdam, Finance Secretary: Bah Aimusing Khongjee.
Ha kane ka sngi la ïoh ruh ban aiti ha kitei ki nongïalam ba kin pyndep ban thaw ïa ka Executive Committee kiba ïadei dur bad ka riti treikam bad ruh ba ki dkhot kin ïadonbynta lang na baroh ki bynta ka Riwar Mihngi.
La ïoh ruh ki jingkren kyntu kynpham na ki nongïalam ka Meghalaya Football Assocïation.
La pyntip ruh ba ka jingïalehkai Final jong Senior Men league 2023 yn pynkut ha ka 16th March 2024 ha ka por 2 baje nohphaisngi ha UUP Stadium Urksew, Pynursla bad ki team ki ban ïaknieh ïa ka nam lahduh kin long KA Pynursla United Youth Club pyrshah ïa ka Lapalang Sports club.
