Jam ka Nongbri Brothers FC sha ka phainal jong ka MFCS da kaba jop ïa ka Azriel SC

0

Mawkyrwat, Ïaïong, 04: Ka Nongbri Brothers FC ka la jam mynta sha ka phainal jong ka Mawlangwir Football Community Shield 2022-23 da kaba jop pyrshah ïa ka Azriel SC, Shillong, lyngba ka tie breaker (4 – 2) ha ka semi-final kaba ar kaba la long ha Madan Saitsnad, Mawlangwir, South West Khasi Hills District ha ka 04 tarik u Ïaïong 2023.
Ha kane ka jingïalehkai, ha ka kylla step, baroh ar ki kynhun ki la ïa khun ban rah ïa ka bol shaneng bad sharum ban ïoh thep hynrei ym shym la don ba lah ban pynkhih jar haduh ban da wai shiteng.
Ynda la dei ka kylla miet, ka jingïalehkai ka la nang i shongshit shuh shuh namar ba baroh ar ki kynhun ki la ïa khun shitom ban ïoh pynkhih jar kaba la pynlong ïa u paidbah nongwan peitkai ban ïa risa. Dei tad ynda la poi ha ka minit kaba 48 ba ka Nongbri Brothers ka la ïoh ban pynkhih jar nyngkong. Kane ka la pynlong ïa ka Azriel ba kan ïa khun shitom ban ïoh pynphai. Wat hapdeng ki jingpyrshang ba bun, ka Azriel kam shym la lah ban pynphai bad ka la pynlehnohei ruh ïa kiba bun ki kabu ksiar bad wat ïa ka penalty kaba ka la ïoh ruh. Ka Nongbri Brothers ruh ka la ïakhun shitom ban thep kol shuh shuh bad ban ym ailad ïa ka Azriel ban ïoh thep kol. Hynrei ynda la poi ha ka minit ka 90+4, ka Azriel ka la ïoh ïa ka kabu ban pynphai kylla ïa ka kol bad kumta ban pynïakhaid ïa ka jingïalehkai. Namar ka jingïakhaid, la hap ban pynïalehkai biang lyngba ka extra time hynrei ym shym la don ba la lah ban pynkhih jar. Kumta, hadien ka extra time, la rai ban pynïaleh noh da ka tie breaker.
Ha ka tie breaker, ka Azriel ka la shut 4 sien ba ka la thep 2 sien. Ka Nongbri Brothers pat ka la shut 4 sien bad ka la thep 4 sien. Kumta lyngba kane, ka Nongbri Brothers ka la jop ïa ka jingïakhun da 4 – 2 bad, namarkata, ka la jam ïa lade sha ka final ha kaba kan sa ïa aireng pyrshah ïa ka Se Lajong FC.
Ha kaba ïa dei bad ka phainal jong ka MFCS 2022-23 hapdeng ka Se-Lajong FC bad ka Nongbri Brothers FC, ka Mawlangwir Sports Club kan sa nang ai ka jingpyntip. Ka Sports Club ka kyrpad ïa ki paidbah riew-ieid phutbol ban sa buddien ïa ki jingpyntip lyngba ki kotkhubor, youtube, bad ki social media account jong ka Sports Club, kata ka Facebook bad Instagram, bad kumjuh ki poster kiba yn tah ha man ki shnong.

Leave A Reply

Your email address will not be published.