Syrtok ki paidbah ki san shnong ka thaiñ Umshynrut ba shong dum khlem bording

0

Nongstoiñ, Ïaiong 4: Ka jingput rongsing jong ka sorkar kmie ban pynpoi ïa ka bording jingshai ha man la ki thliew Ïing jong ki nongshong shnong jong ka Ri India baroh kawei, imat ka la shu long tang kum ka kyntien, kaba la shu ong hana kin leh kumne, kin leh kumtai. Hynrei ka kam pat kam shym la long kumba la ïoh sngew.
Lah ban pynshisha ïa kata lyngba ki san shnong kiba ha ka thaiñ Umshynrut, kiba la mad ïa ka jingshong dum khlem bording mynta lah kumba saw snem kynthih. Kata ka long naduh ka 31 tarik u bnai Lber snem 2016 bad haduh mynta mynne ruh, ym pat don ka jingmaramot wat tang shisien bad ïa ka ka daw jong ka jingshah ot noh ïa ka bording ym shym la lah ban tip.
Kitei ki san shnong ki kynthup ïa ka Tlon, Umjajew, Photjalei, Mawjeiñlang bad Umshynrut. Haba ïakren bad u nongthoh khubor, ki nomgïalam shnong bad ki riew rangbah, ki la pynpaw ba kala ktah ruh ïa kiba pang ba shitom, namar ka jingbymlah ban treikam bha ka CHC namar ka jingbymdon ïa ka bording ilektrik.
Ki nongïalam ka synjuk ki nongsynshar shnong hapoh ka shatri jong ka JAC ki san shnong Umchynrut Area, hapoh ka jingïalam jong u bah Kitboklang Sangriang Shongknor ki san Shnong bad bah Brostar Tyrsa Secretary, ki la pynpaw ba dang shen ki la leit ruh ban ai jingthoh biang ha u Executive Engineer jong ka MeECL Nongstoiñ Division West Khasi Hills District, kumjuh ruh la ai kopi ha u nongmihkhmat jong ka thaiñ.
U Secretary ka Synjuk u bah Brostar Tyrsa haba ïakren bad ki nongthoh khubor, u la pynpaw ïa ka jingsngewdiaw kaba jur ba ki paidbah nongshnong shnong katei ka thaiñ ki la mad ïa ka jingshong dum kaba la palat saw snem namar ka jingduh noh jong ka bording ilektrik.
Shuh shuh, haba batai bniah halor kane ka jingeh, u la ong ba na ka liang jong ka synjuk, ka la dep ban ai da ka jingthoh sha u E.E ka tnad MeECL Nongstoiñ Division ha u snem 2010, 2012 bad 2014 bad lyngba kitei ki lai tylli ki jingthoh na ka liang jong ka ophis, ka la phah ïa ki nongtrei ban wan peit bad ban shna ïa ka bording kaba la ïoh ruh lyngba ka skhim RGBBY.
U la ong ba naduh ba la wan poi bording lyngba katei ka skhim, ka shnong ka la ïoh ban mad ïa ka jingshai tang kumba saw bnai ei ei. Hynrei naduh ka 3 tarik u Lber 2016, kitei ki shnong ki la mad biang ïa ka jingshong dum, na ka daw ba la shah ot noh ka bording. U la ong ruh ba ïa ka daw jong ka jingshah ot, kim shym la tip satia bad ki la hap ban mad ïa ka jingshong dum haduh mynta mynne.
Ka jingbym don ïa ka bording, ka la ktah haduh katta katta ïa ki paidbah nongshong shnong, khamtam ïa ki khynnah skul. Nangta ka la ktah ruh ïa kiba pang ba shitom, namar ka jingbym lah ban treikam bha ka CHC na ka jingbym don ïa ka bording ilektrik.
Na ka liang jong ki paid nongshong shnong jong katei ka thaiñ, ki la kyrpad ïa ka sorkar bad kumjuh ïa ka tnad MeECL, ba kin phai khmat lem sha katei ka thaiñ ban pynïoh pat ïa ka bording.

Leave A Reply

Your email address will not be published.