Nongstoiñ, Ïaïong 4: Wat la ka jylla Assam bad Meghalaya ka dang pynsahteng ha ka ban pynbeit ïa u pud u sam ha ki hynriew tylli ki jaka ïa kajia pud, hynrei ki paitbah ba shong ba sah ha ki shnong khappud ki la khmih lynti bad kyrmen ba ha kane ka sien kaba ar jong ka jingïapynbeit ka sorkar kan shim ban pynbeit katkum ka mon jong ki paitbah nongshong shnong.
Ha kaba ïadei bad ka jingpynbeit ïa ki shnong ki thaw bad ki jaka puta jaka puta kiba hap ha Langpih sector, kan long kaba eh haduh katta katta ba ka Meghalaya ka lah ban ïoh lut ïa ki jaka kumba ka long, namar ba ïa ki ar phew wei tylli ki shnong kiba la shong la sah da ki Jaitbynriew Garo ba la khleh lang da ki jaitbynriew Rabha bad Nepali kum ka Kamphaduli, Hakumari, Gohalgona, Undiengphiang, Umthli, ter ter haduh Doledonga, ka Assam kan ym ai ei sha Meghalaya wat lada dei haduh ba ïa katei ka jingpynbeit pud yn pynsahteng shi junom ruh.
Ha kaba ïadei bad ki shnong Khasi pat, u bah Slikshon Hoojon sordar jong ka shnong Umyiap Nongmynsaw Syiemship haba pyntip ha u nongthoh khubor, u la ong ba ki sordar jong ki shnong Khasi naduh Nongmawleiñ, Ïewnongma, Mawlan, Langpih Umtap, Madanjaïaw, Langpih, Umwali, Mawdiangsnam, Domtiewaw, Umwahsiang, Mawsikar, Umyiap, Umbyrsit, Umpha, Nongma, Nongmawlong bad kiwei kiwei ki shnong, ki la pynkhreh ïa ki jingthoh jingtar kiba biang ban aiti ha ki nongïalam jong ka Regional Committee on Border Dispute ynda ki la wan ban jurip ïa katei ka thaiñ.
U bah Hoojon u la ong ruh ba baroh ki sordar jong kitei ki shnong ryngkat ki paitbah, da kawei ka jingmut ki la rai ba lada ka ka sorkar Meghalaya kan shah ïa ka Assam ba kan knieh wat tang ïa kawei ka shnong Khasi ruh kin ym ailad, namar ki don ïa ki jingthoh jingtar bad ki dulir kiba biang ba kitei ki shnong ba la kdew ki dei hok ki shnong Khasi naduh hyndai kulong kumah.
U la ong ruh ba ki paitbah Khasi kiba shong ha kitei ki shnong kim don kano kano ka jingsngew ïapher jaitbynriew bad ki Nepali kiba shong ha Langpih, Makaibari, Umahshar, Mawbynna haduh Lawbah, namar na shaphang shatei la kerkut da ki shnong Khasi suda bad ha ka kamai kajih bad ka khaïi ka pateng ruh ki ïatreilang. Lada jia ba ki ar sorkar ki la lah ban pynbeit ïa u pud u sam ba thikna bad kitei ki jaka ba shong ki Nepali ki hap ha Meghalaya, ki sordar shnong bad nongsynshar hima kin sa shong pyrkhat ban thaw ki lad ki lynti kumno ban leh na ka bynta ki Nepali.
Haba kylli pat ha kaba ïadei bad ki jingïakajia kiba ju jia khah khah ha ki snem ba la dep, u la ong ba ka long kaba shisha ba ki ju don ki jingïakajia ha ki snem ba la dep. Hynrei naduh ba ka ktem pulit jong ka Meghlaya ka la don ha Langpih, wat kito ki Nepali kiba ju mushlia bad thaw ki kam pynklumar ruh kim nud shuh.
Ha kine ki sngi lei lei naduh ba la kyntiew kyrdan ïa ka Raidmynsaw Upper Primary sha ka Secondary School, baroh ki Nepali ki la leit pule ha katei ka skul. Na ka jingleit skul jong ki khun, ki kmie ki kpa kiba dei ki Nepali ruh ki la ïa sngewjuh sngew jan bad ki la sngew lehraiñ ban lushia than ïa ki Khasi kiba shong ha katei ka thaiñ.
