La pynkup burom ïa ki nongsynñiang snam haka prokram World Blood Donor Day ha Jowai

Jowai, Jylliew 12: Ka ophis jong ka Jowai Civil Hospital Blood Centre, Panaliar, West Jaiñtia Hills District, Jowai mynta ka sngi Thohdieng kala rakhe ïa ka World Blood Donor Day, da kaba pynkup burom ïa ki nongai snam mon sngewbha haka jingïalang ba la pynlong ha Tpep-Pale Community Hall, Jowai halor ka phang “One Drop of Humanity, Give Blood. Save Lives”.
Ka Assistant Commissioner kong Emelya Ch. Momin haba ai jingkren kum ka kongsan kala ïaroh ïa ki nong synñiang snam ba man ka por, kiba long ki nong kyrshan ïaka imlang sahlang na ka bynta kito kiba donkam kyrkieh ïa ka snam ban ïoh jingim. Kala ong lyngba ka jingai snam kaba long ka jingim ban ïarap ïa ki nongpang ba shah sumar bad ïa kiba haïing hasem jong ki.
Shuh shuh kala kdew ba ïa ka snam ym lah ban shna bad lah ban ïoh tang lyngba ki jingai da ka mon sngewbha. Ka la khot ïa ki nongshong shnong khamtam ïa ki samla ban ïashim bynta shitrhem ha ka jingai snam mon sngewbha. Kala pynpaw ruh ka jingsngewnguh ïa baroh kiba don bynta naduh nongai snam kumjuh ïa ki nongtrei Hospital bad ki nongtrei mon sngewbha haka imlang sahlang.
Ha kane ka prokram la ïashim bynta lang haka jingpule ïa ka soskular ban ai snam mon sngewbha, da kaba pynshlur bad kyrshan man ka por ïa ka kam synñiang snam.
Ka Dr. I Khyriem, Sr. Medical & Health Officer, Incharge JCHBC haka jingkren kala ban jur ïa ka jingdonkam jong ka jingai snam mon sngewbha ha kaba pynthikna ban ïoh ïa ka snam kaba shngaiñ bad kaba bha na ka bynta ki nongpang kiba donkam ïa ka jingïarap.
Ka Dr. Khyriem kala pynpaw ka jingsngewkhia halor ka jinghiar ka jingai snam mon sngewbha haka District kaba la hiar na ka 29 percent ha u snem 2024 sha ka 20 percent ha u snem 2025. Ka la khot ïa ki tnad sorkar, ki jaka pule, ki seng bhalang bad ki samla ban pynlong ïa ki prokram ai snam sngewbha bad ki prokram pynshai paidbah.
Ka Principal jong ka Thomas Jones Synod College, Jowai ka Dr. Ailynti Nongbri, ka la pynsngew ka jingai snam ka long ka kam kaba donburom, ka jingsngewrit bad ka jingshakri ïa ki para briew. Kala kyntu ban don ka mynsiem jingïaieit bad kala pynshlur khamtam ïa ki samla ban mih shakhmat ban synñiang ïa ka snam na ka bynta ban pynim ïa ki mynsiem kiba kordor.
I Dr.(Shri.) Job R Kawini, Adventist Youth Ministries bad ma Cheiniwanki Naingti kila ai jingkren halor ka jingdon bynta lang jong ki haka jingsynñiang snam bad pynshlur ïa kiwei ban wan wan shakhmat ban ai snam ban pynim ïa ki mynsiem briew.
Ha kane ka prokram la wan ban don lang naduh u Dalloi ka Elaka Jowai ma Puramon Kynjing, ki riew rangbah, ki nong synñiang snam, ki kynhun seng bapher bapher bad ki nongtrei ka koit ka khiah.
Ïa ka jingïalang la pynïaid da Dr. B. Lipon, Anesthetist, Jowai Civil Hospital, la ïoh ka jingkren pdiang na ka kong Noris Mary Dkhar, Lab Technician, JCHBC bad ki kyntien ai khublei na ka kong Memory Lamin kaba dei ka Staff Nurse.