Ka jingri ïa ki Syiar Khasi ka la duna hynrei dang don ha ki katto katne ki shnong ha WKHD

Nongstoiñ, Jylliew 12: Ka jingsdang jong ki paitbah nong shong shnong ha West Khasi hills ban ri ïa ki syiar broiler bad curoiler kiba dei ki syiar kiba la pynpdem pylleng da ka bording eletrik ba la pynmih na ki pham ri syiar ka la sdang ka jingri ïa ki syiar Khasi ka la duna bha wat ha ki nongkyndong ruh.
Wat la katta ruh ki dang don ki nongshong shnong kiba dang pynneh ban ri ïa ki syiar Khasi haduh mynta myn ne.
Ha ki snem ba mynshuwa ka ïew Markasa ka dei ka ïew kaba wan nyngkong eh ha ka jingbun jong ki syiar Khasi ha man la ka sngi ïew bad bun bah ki nongleit nogn wan kiba mih na Shillong ban hiar sha Nongstoiñ bad kiwei kiwei ki jaka hapoh West Khasi hills ki ju hiar ban bam ban dih ha Marakasa namar ba ki dukan sha dukan ja ki biang bha ka doh syiar Khasi.
Nalor kata ka ïa ka ïew Markasa la ju tip ruh kum ka ïew khaïi blang kaba heh tam ha West Khasi hills.
Dang ha kine ki taïew ba la dep ha ka jing leit peit jong u nongthohkhubor jong u Mawphor la lap ba ki syiar Khasi ba ki nongshong shnong ki wan rah ban die sha ki nongkhaï kiba ju wan thied syiar borabor kim da bun shuh hynrei naduh dang step haduh ka por mynsngi ki don tang kumba sawphew haduh sanphew tylli ei ei.Ha kajuh ka por la leit peit ruh ïa ka jaka die blang bad la lap ba ki don tang kumba phra haduh shiphew tylli ei ei.
Haba ïakren bad ki nongkhaï syiar bad ki nongkhaï blang ki la ïathuh ba la kumba ar ne lai snem ei ei ba ka jingwanrah syiar Khasi da ki nong shong shnong ka la duna haduh katta katta.Ki la ong ruh ba ha ki snem ba mynshuwa man la ka sngi ïew Markasa da ki phew tylli ki ruh ki dap da ki syiar bad don ki por ba ha ka shi sngi ïew ki syair Khasi kiba wan rah da ki nongshong shnong ban die kim ju duna ïa ka phraspah haduh khyndai spah tylli.
Ha katei ka sngi la ïoh ban ïakren ruh bad ki nongkhaï blang ha kaba ki la ïathuh ba ha ki snem ba kham mynshuwa man ka sngi ïew katei ka jaka ka dap da ki spah tylli ki blang ba ki nongshong shnong kiba wan ïew wan hat ki wan rah ban die na ka bynta ban ïoh bai siew bai tda hynrei mynta la kumba lai ne saw snem ei ei ka jingwanrah jong ki nongshong shnong ïa ki blang ban die ha katei ka ïew ka la duna haduh katta katta.
Ki la ong ruh ba ki don ki por ba lada poi ha ka shi sngi ki blang ki ba poi ha katei ka jaka ïadie ïathied ki poi tang kumba arphew haduh arphew san tylli.Kitei ki nongkhaï blang ki la ong ruh ba ha ka jingshisha ki shnong ha katei ka thaiñ ki dei kiba dang pahuh bha ka jaka ban ri blang tangba kim tip pat balei ba ka jingri blang ka la duna.
Ha kajuh ka por ki la ong ba ki blang ki dei ki jingri kiba kyntiew bha ïa ka ïoh ka kot bad ka kami kajih namar ba ki heh kloi bad ka dor ïew dor hat ruh ka la nag kiew bad lada ki nongshong shnong ki minot ban ri ïa ki blang ka long ka jingmyntoi kaba khraw ïa ki ïng ki sem jong ki.