Nongpoh, Rymphang 03: Ka jingwan pynïasoh ki ar ngut ki riew shemphang kiba la biang ha ka kyrdan pule puthi bad kiba la ioh pdiang ruh ïa ka Padma Shri Award ka la ai mynsiem shibun eh ïa ka University of Science and Technology, Meghalaya kaba don ha Baridua Killing, Ri Bhoi District, namar na ka liang kitei ki ar ngut ki la wan ban rung kum ki dkhot katei ka skulbah na ka bynta ban dang kyntiew ïa ka pule ka puthi bad kiwei kiwei ki bynta ha ka laing ban kyntiew ïa ka jingnang jingstad.
Kine ki ar ngut kiba la wan ban rung dkhot na ka bynra ban trei hapoh ka University of Science and Technology, Meghalaya ki kynthup ïa u Dr. Sarbeswar Sahariah bad u Dr. Ilias Ali kiba la ioh pdiang ruh ïa ka khusnam ba la tip kum ka Padma Shri Award.
U Dr. Sahariah u la shimti kum u Pro Vice chancellor ka USTM bad u Dr. Ilias Ali kum u professor na ka bynta ka PA Sangma International Medical College & Hospital (PIMCH) ka USTM ban sa sdang shen ban pyntreikam hapoh katei ka skulbah kaba don ha Ri Bhoi District.
Ka long ruh ka jingai mynsiem ïa kane ka skulbah, ha kaba nalor kitei ki riew shemphang kiba la wan ban rung dkhot katei ka skulbah, ki don ruh haduh 40 ngut ki doctor lane kita ki Physician kynthup ïa kiba la shongthaid na ki kam kin wan ban ïa trei lang ha kane ka skulbah ha kaba kyntiew ïa ka jingsumar nalor ba kane ka skulbah ka la plie lad plie lynti ïa ki samla pule kiba pyntbid ha k jingpule bapher bapher.
Ha ka sngi palei jong kane ka taiew, u Dr. Sarbeswar Sahariah bad u Dr. Ilias Ali ha ka jingïalang kaba la long ha katei ka skul bah, ki la ai jingkren bad ki la pynpaw paidbah ruh ba kin long kita ki dkhot katei ka skulbah na ka bynta ban ïatrei lang ha kaba kyntiew naduh ka pule ka puthi bad ruh ki jingsumar ïa ki paidbah ba kane ka skulbah ka la sdang ba seng sa ki jaka ai jingsumar ki ban sumar katkum ka juk stad ba mynta.
U Dr. Sahariah u dei uba la trei kum u Chief Transplant Surgeon & Urologist ka KIMS Hospitals Hyderabad bad u Dr. Ilias Ali kum u Managing Director ka Global Hospital, Guwahati bad mynta ki la wan ban ïa trei lang ha katei ka skulbah kaba buh ïa ki jaka pule bad ki jaka ai jingsumar na ka bynta ki paidbah.
U Chancellor ka USTM, u Mahbubul Hoque, ha ba kren ha katei ka sngi, u la pdiang burom ïa kine ki ar ngut ki riew shemphang kiba la ioh pdiang ïa ka khusnam Padma Shri Award bad kumjuh ruh kitei kiwei ki doctor kiba la rai ban ïatrei lang ha USTM na ka bynta ban ai ka jingshakri kabab ha tam ïa ki samla pule bad ruh na ka bynta kiba pang ba shitom ki ban sa wan shah sumar ha katei ka jaka ai jingsumar ha USTM.
