Nongpoh, Rymphang 03: Ka Khasi Student Unioni, Nongpoh Circle bad ka KSU Nongpoh Town Unit mynta ka sngi ki la leit ban beh krat ïa ki bar jylla kiba wan die pipe um ha ka surokbah National Highway-6 ha Ri Bhoi kaba dei hadien ba ki la tip ba kitei ki bar jylla ki la shu wan leh ïa katei ka kam khaïi khlem da don ka Trading License ne ioh bor da ki bor ba dei peit ïa ka kam khaïi pateng.
Ki nongïalam ka KSU ha ka jingïalam u President ka Nongpoh Circel, u Samla John Lyngdoh bad u President ka KSU Nongpoh town Unit, u Samla Ïabhalang Nongrum ryngkat ka jigndon lang u Sport Secretary ka KSU North Khasi Hills District, u Samla Johny Nongrum, ki la leit ha ki ar jaka ban beh krat ïa kitei ki bar jylla, kaba dei halor ka jingbym ioh bor ha kaba ki la shu wan khaïi beaiñ khlem da ioh bor na ka tnad ba dei peit ïa ka kam khaïi pateng.
Kine ki ar tylli ki jaka ba la wan ban die pipe up ban da kitei ki bar jylla ki kynthup kawei ka jaka ha Saiden bad kawei pat ha Shangbangla harud ka surokbah National Highway-6 ha Ri Bhoi District.
Ha kane ka jingleit jurip hadien ba ki la lap ba kitei ki bar jylla kim don ïa ka Trading License na ka KHADC, ki la pynsangeh bad beh krat syndon da kaba khanglad ba kim dei shuh ban die ïa kitei ki pipe um katba kim pat ioh ïa ki kot ki sla kiba biang ba ki la ioh ïa ka bor na ki tnad ba dei peit ka sorkar.
Haba kren sha ki lad pathai khubor, u President ka KSU Nongpoh Circle, u Samla John Lyngdoh, u la ong ba ka seng ka pyrshah jur ïa kum kine ki jingleh beaiñ ki bar jylla ban shu shim kabu ha ki kam khaïi pateng khlem da bud ïa ki kyndon ba la buh da ka sorkar bad tang ban ioh jingmyntoi ïa lade ki wan ban seng kam seng jam ha kaba kane ka pynduhnong kylla ïa ki trai muluk ki trai jaka ha kaba ïa kitei ki jaid kam dang lah ban trei da ki trai muluk ki trai jaka.
Shuh shuh, u la ong ruh ba ka KSU kan dang peitpyrman nangne shakhmat bad kan nym ailad ba ki bar jylla kin shu wan ban bsuh khlieh ha ki kam khaïi khlem da don ki trading license ne ki Labor License bad lada ka seng ka dang lap nangneh shakhmat kan shim da kiwei ki lad kiba kham tyngeh, namar kumba long haduh mynta ka KSU ka ieng ha ka Nongrim ban ailad ïa ki trai muluk ki trai jaka ba kin ioh ban bsuh khlieh ha ki kam khaïi ym da ki bar jylla kiba shu wan tang ban kjit ïa ka spah ka phew kaba don ha kane ka jylla, u la bynrap.
