Nongpoh, Ïaiong 26: Da ka jingbuddien halor ka jingioh lum jingtip ba thikna ba ki don ki nongkhaïi Drok beaiñ ban shalan tuh na Tripura sha Bihar, ki Pulit ka Ri Bhoi mynta ka sngi ki la pynpulom noh ïa kitei ki nongkhaïi drok da kaba ki la ioh ban bat ïa katei ka Tourist Bus ha Byrnihat kaba dei hadien ka jingpynap shrip jong ki ïa katei ka Tourist Bus.
Katei ka Tourist Bus ba la ioh bat da ki Pulit ka Ri Bhoi ka dei kaba don ïa u number AS 01 LC 1412 ha kaba ki pulit ki la pynap shrip ha Byrnihat bad hadien ba la ioh bat ïa katei ka Bus ki la pynlong ïa ka jingtalasi ba lap ruh ïa u Drok Marijuana ba la suba khaïi tuh da ki ar ngut ki briew kiba dei na ka jylla Bihar.
Kumba la ïathuh da u heh Pulit ka Ri Bhoi, ha ka jingtalasi ïa katei ka Bus ki la ioh ban kem ïa ki ar ngut ba suba don kti ha kaba khaïi tuh ïa utei u drok Marijuana bad ba la tip kyrteng kum u Rohit Kumar na Patna, Bihar bad ka Premlata Devi na Khagaria, Bihar.
Ki bor pulit ha ryngkat ki nongsakhi ba la ioh kurup ïa une u drok Marijuana ki la pyndonkam ruh ban pynthikna lyngba ki kor ki bor ha kaba la pynthikna ba u dei u drok Marijuana bad utei u drok u la don ka jingkhia kumba 16.2 kg.
La ïathuh ruh ba ki Pulit ki la kem noh ïa kitei ki ar ngut bad la pynngat ruh katkum ki kyndon aiñ ka Narcotic Drugs and Psychotropic Substances (NDPS) Act. Ki pulit nalor utei u drok Marijuana ki la ioh kurup lang ruh ar tylli ki Mobile phone ha kaba ka jingtohkit halor kane ka jingioh kurup drok ka dang ïaid shaphrang ban leh katkum ki kyndon jong ka aiñ, ong utei u heh pulit ka Ri Bhoi.
