Nongstoiñ, Ïaiong, 26: Ka seng FKJGP Nongstoiñ pyllun ha ka sngi balang, ka la leit ban jurip ïa ka skul Jawahar Navodaya Vidyalaya Nongstoiñ kaba don ha ka shnong Mawkhlam Nongpyndeng, hadien ba ki khynnah pule kiba sah hostel ha katei ka skul ki la ujor ïa ka jinglong syier jong ka building.
Ha katei ka jingleit jurip, la lap shisha ba katei ka hostel ka don shibun ki jaka kiba la synjor bad ba la sdang orpait ha ki bynta kiba bun. Pynban khlem da maramot hynrei la shu tah tang da ka rong halor ki jaka ba jot.
Kitei ki bynta kiba la sdang orpait ki dei ki jaka sah jong ki khynnah kynthei. La ïohi ruh ba wat haba ka dei da ka dewbilat, phewse ka la I shongsyier namar ki don bun ki bynta kiba hap hi bur bur lada kum pyndei wat tang da ki kti.
Ha ka jingïakren bad u Principal jong katei ka skul, u la ong ba na ka liang jong ka skul ka la phah jingthoh ban pan jingïarap na ka bynta ban ïoh maramot. Hynrei namar ba ka dei na ka sorkar kmie kumta kan kham shim por ban pyndep.
Haba ïadei bad kane ka phang, na ka liang jong ka seng ka la ong ba kan sa leit ban ai jingthoh ha u khlieh duh ka District jong ka West Khasi Hills u ba dei ruh u shongknor jong katei ka skul, ba un tuklar ïa katei ka kam namar ka ap jingmynsaw ïa ki khynnah pule kiba sah ha katei ka hostel.
Ha katei ka sngi la ïadonlang u samla Pynshai Kharbani President FKJGP Nongstoiñ pynllun bad kiwei kiwei ki dkhot jong ka seng.
