Sa kawei ka karkhana saiñ nar yn pynïeng harud ka wah Rwiang, ïathuh u Bah Dominik Lyngkhoi

Nongstoiñ, Ïaïong, 26: Nalor ka Shakambari Ferro Alloys Limited kaba la don lypa, sa kawei pat ka karkhana saiñ nar ka la sdang ban pynbit pynbiang ïa ka jaka ban shna, kata sha shiliang shaphang shathie ha ka jaka kaba hap hapoh u pud u sam jong ka hima Nongstoiñ.
U Bah Dominik Lyngkhoi u la ong ba la ïoh jingtip ba ïa katei ka karkhana kaba thymmai, la seng da uwei u bar jylla u ba la tip kyrteng kum u Agarwal bad u Local Director u dei u Khasi na Shillong. Katei ka karkhana ka treikam kumjuh kum ka Shakambari Ferro Alloys Limited.
U bah Dominik Lyngkhoi haba ïakren bad u nongthoh khubor, u la ong ba naduh ha kine ki khyndiat sngi ma u bad ki paralok ki la leit tong doh shalynnai na wah Rwiang na ki jaka ba kham sharum ïa katei ka karkhana. Haba ki ngam ha um tang dpei kaba ka um ka kit na ka jingpyntuid jong katei ka karkhana ka kot haduh khohsiew ka jingrben bad haba ngam hapoh um ka jyrsieh la kum ka ktieh shrah.
U la ong ruh ba ki shnet jong shalynnai ne ki dohthli ki sop da ki pui pui dpei suda, lada peit ïa ki shymprong lei lei ki la ithamula, namar ki kti ki kjat bad ki tmaiñ ki la heh kat u biri mother India. Lada shet ruh haba bam ki la sma iwkhong bad kim bang shuh kum ki ba don ha kiwei kiwei ki wah.
Ha kaba ïadei bad ka jingsynlen ki khlaw ki btap, u bah W.Thongni uwei na ki nongïalam jong ka Rwiang Area Wildlife Protection Association, u la ong ba na ka por sha ka por ka Association ka la maham ba ym bit ban pynïap pathar ïa ki mrad ki mreng, ki doh um doh wah, ki sim ki doh bad baroh ki jingthaw ba im ha katei ka thaiñ, ki phet hi namar ka jingsma iwkhong palat ka tdem kaba mih na katei ka karkhana.
U la ong ruh ba lada peit kai ïa ki jaka naduh Rwiang haduh Umdeiñ, Nongjri, Mawkhar, Nongsleh, Mawsaw, Mawsyrpat, Nonglang, Seinduli, Mynñiar, Nongstong Kyrdum, Umwahlang, Mawkapiah, Kyndongei ki khlaw ki la lut khait.
U la ong ruh ba lada tang katei kawei ka karkhana saiñ nar ka ktah haduh katto ïa ki khlaw ki btap bad ïa ki jingthaw ba im. Lada yn ïeng sa kawei ka karkhana lei lei lei la kulmar lut ka pyrthei tangba ym lah ban leh ei ei, namar wat ki bor sorkar kiba dei peit ïa ka jingkhuid jingsuba ka mariang ruh ki la shah pynmatlah ha ki bor jong ki nongpynïaid jong katei ka karkhana.
Kum ban pynkynmaw ba ka Meghalaya High Court ka la dep pynmih ïa ka hukum ban pah khang ïa ka Shakambari Ferro Alloys Limited, hynrei kam shi sangeh wat shi sngi ruh bad katei ka jingbym kohnguh jong katei ka karkhana ïa ka hukum jong ka Meghalaya High Court, ka pyni shai kdar ba ki nongpynïaid jong katei ka karkhana kim burom satia wat ïa ka Ïing bishar.