La pyllait ïa u khaw rashon ha Eastern West Khasi Hills

0

Mairang, Ïaiong, 26: Ka ophis jong u Deputy Commissioner (Supply) ka Eastern West Khasi Hills District ka pynbna paidbah sha baroh ki longïing kiba don hapoh ka distrik, ba la pyllait lyngba ki dukan rashon ïa u khaw rashon katkum ka National Food Security Act, 2013 na ka bynta u bnai Ïaiong 2023.
Na ka bynta u khaw PHH, yn sam 5 kilo shi khlieh briew khlem da donkam ban siew pisa, na ka bynta u khaw AAY, yn sam 35 kilo shi card bad ïa une ruh ym donkam ban siew pisa; katba, ïa u khaw Non- NFSA pat yn sam 7.215 kilo shi card ha ka dor 13 tyngka shi kilo.
Ym bit ban ai duna ne ot na ka bhah ba la buh ne mang da ka sorkar, ha kaba ïadei bad ka jingsam ïa uno uno u mar bam ba la ai na ka NFSA bad Non-NFSA. La bthah ruh ïa baroh ki FPS dealer, ba kim dei ban pynduh khaw ïa kito ki nongbam ki bym pat don ïa u Aadhaar Card bad ïa kito ki ba la pynjah ïa ki card rashon ki jong ki.
Ïa ka bai kit bad bai kali ban pynpoi ïa kine ki marbam hapoh jong kitei ki skhim, yn bei pisa da ka sorkar sha ki Wholesaler ne Dealer kumba ju leh na ka por sha ka por.
Lada lap ïa kino kino kiba pynkheiñ ïa kitei ki kyndon, yn pynshitom katkum ka aiñ bad lada don kano kano ka jingujor halor ka jingbym thikna ka jingsam ïa ki mar rashon, ki nongïoh bhah ki lah ban phah da ka jingthoh sha u District Grievance Redressal Officer & Additional Deputy Commissioner (Supply), Eastern West Khasi Hills District, Mairang lane ki lah ban thep ha ka Complaint Box ba la buh da ka office u Deputy Commissioner (Supply), pynkut ka kyrwoh jong u Deputy Commissioner (Supply) ka Eastern West Khasi Hills District.

Leave A Reply

Your email address will not be published.