Ka jingpynmih ïa ki mar rep ban pyndap bam ïa ki nongshong shnong ka long ka phang kaba kongsan haduh katta katta ban sngewthuh bad pynleit jingmut na bynta ka jingdonkam u khun bynriew ban im.
Haba ngi phai sha kane ka bynta ngi donkam ban sngewthuh ïa ka jingtyllun ka por ba ngim dei ban shu shaniah tang ha kiwei ha kaba ïadei bad ka jingpynmih ïa ki mar rep.
Ka jingkylla jong ka suiñbneng ka dei kawei ka mat ba ngin sngewthuh ba ka ktah ïa ka jingpynmih ïa ki mar rep namar ka jingkiew jong ka jingshit ha kaba ki jingthung jingtep ki shah ktah ha ka jingheh jingsan. Nalor kane ka jingshah ktah namar ka suiñbneng, kawei pat ka mat ka dei ka jingkiew sted ha ka jingbun briew. Kine ki dei ki jingeh kiba lah ban wanrah ïa ka jingkyrduh ne duna bam ha ki sngi bad por ban wan lada ngim ïohi jngai.
Ban pynkhreh ïa kine ki jingma kiba lah ban mih na kine jingeh ka long kaba donkam ba ngin kyndit bynriew ba ngin shim ïa ka jingkitkhlieh ba ngi dei ban pynkhlaiñ ïa ka kam rep ban pynmih bam na la ki shnong bapher bapher ka Bri u Hynñiewtrep bad ka jylla baroh kawei.
Ka jingpynkhlaiñ ïa ka kam rep kan ïarap ban pyndap bam ïa ngi kum ka jaidbynriew lada don ka jingkyrduh bam ne duna ka jingmih ki mar rep ha ki por ban wan na kiwei ki jylla kiba ju pynmih ïa ki mar rep ban pyndap bam ïa ki nongshong shnong ka Ri India baroh kawei bad kan long ruh ka lad ïa ki khun samla kiba lah nang lah stad ban phai sha ka kam rep kum ka lad kamai kajih da kaba pyndonkam ïa ka jingstad katkum ka juk saïan kaba mynta ha ka kam rep kaba lah ban pynmih bun ki mar rep. Kyrmen ba ngin ïohi jngai bad sngewthuh ïa kane ka jingpashat jingmut na bynta ka bha ka miat jong ngi kum ki nongshong shnong ka jylla.
Hooid! ki don ki jingeh ba ki nongrep ki mad na ka por sha ka por ha bun ki bynta kiba lah ban pynduh jingkyrmen ïa ki. Kyrmen ïa kita ki jingeh baroh ba ki mad yn lah ban weng da ka jingshimkhia ki nongïalam jong ngi bad kumjuh da ka jingïaid beit ïaid ryntih ka ïew ka hat ne ka die ka thied khnang ba kan ai mynsiem ïa ki nongrep bad khun samla jong ngi kiba lah nang lah stad ban phai sha ka kam rep kum ka kam kamai ja kpoh.
