Khliehriat, Nailur, 6: Ka jingïoh jong ka Lumshnong PHC ia ka X-Ray bad ka Ultrasound Machine ka dei khubor ba sngewtynnad ha ka histori jong ka tnat ka koit ka khiah ha ka jylla Meghalaya bad kane ka dei lyngba ka jingbei pisa kaba na ka District Mineral Funding Trust (DMFT).
Ia kine ki mashin la pyllait paidbah da ka MLA jong ka Sutnga Saipung Constituency ka Kong Santa Mary Shylla ha ka sngi Balang ha Lumshnong PHC.
La ong ruh ba ka DMFT kan sa pyllait biang ïa ka mang tyngka na ka bynta ban shna ïa ki kamra ha katei ka PHC namar ban buh ïa kitei ki machine donkam ban don da ki kamra kiba bit ba biang.
Haba kren ha ka jingialang ba la pynlong ha phyllaw jong ka Lumshnong PHC, ka kong Santa Mary Shylla ka la ai ka jingkhublei ïa ka committee jong ka DMFT kaba la pynïoh ïa ka x-ray machine bad Ultrasound Machine ha kane ka PHC ha Lumshnong bad ong ruh ba kane ka dei ka histroty ha ka tnat ka koit ka khiah namar ki PHC kim ju ïoh ïa ki x ray, ïa ki ultrasound hynrei tang ki CHC, ka la ong ruh ba kan ialeh katba lah ïoh ban kyntiew noh ïa kane ka PHC sha ka CHC ka ban jong ka jingmyntoi ïa ki paidbah ka thaiñ namar na ka liang jong ka sorkar bad na ka liang ki bor district ruh ki la ialeh shitom ba kyntiew ïa ka tnat ka koit ka khiah bad ka tnat pule puthi.
Ka la iathuh ruh ba kum ka nongmihkhmat ka la dep ban jurip ïa kane ka PHC bad lap ruh ba dang don shibun ki jingduna ha kane ka PHC naduh ki jaka sah jong ki nongtrei, ka iïng PHC (PHC-building) bad kiwei kiwei.
“Nga sngewthuh ïa ka jingeh jong u Medical Officer jong kane ka PHC, hynrei ym dei ban khuslai ngin pysrhang ban pynïoh sa uwei u MO ha kane ka PHC” ong ka kong Santa, ha kajuh ka por ka kyntu ïa ki nongtrei jong katei ka PHC ba kin trei bha ïa ka kam ban iarap ïa ki paidbah ka thaiñ bad kam kwah satia ba kan mih kano kano ka jingujor ba ki paidbah kin kynnoh ba ym don ki briew ki ban trei ïa ka kam ban leh ïa ka x-ray bad ka ultrasound.
U bah Jonathan Shylla, uba dei u ADC ka East Jaiñtia Hills District, u la pynpaw ba ki dang don shibun ki jingduna ha ka ha ka liang ka tnat ka koit ka khiah hapoh ka district bad na ka por sha ka por ki bor district ki ju shong jingialang bad ki nongtrei ka koit ka khiah ban wad lad lynti ban kyntiew bad pynbha ïa ki jaka ai jingsumar, la ong ruh ba ki dang bun ki longkmie ki bym pat shym la wan sha ki hospital ban kha khyllung.
Ha kaba iadei bad ka Lumshnong PHC, la ong ba ki bor district ki la ïoh jingtip ruh ba ym pat don ki kamara kiba biang ban buh ïa ka x-ray machine bad ka ultrasound machine hynrei mynta ka DMF ka kular ban shna ki kamra na ka bynta ki machine.
“Na ka liang ki bor district, hapoh ka jingialam u Deputy Commissioner ngi la phai khmat sha ka tnat ka koit ka khiah, ia ki 36 tylli ki Sub Centre kiba don hapoh ka district na ki por sha ki por ngi pyrshang ban pynbiang pynbit ïa ki tiar ba donkam khamtam na ka bynta ki longkmie kiba ar met kiba donkam ban leit check up bad ha ka por ba kha” ong u bah Jonathan.
U la pynpaw ka jingsngew kmen ba lyngba ka DMF la lah ïoh ïa kine ki machine bad kane kan iarap shibun ïa ki doctor, ki nurse bad khamtam ïa ki briew kiba na ki thaiñ nongkyndong.
U Waheh Shnong Lumshnong, u bah Monlang Ladong, u la ong ba kine ki machine x ray bad ultrasoung ki long ka jingkyrmen ban ïada ïa ka jingim jong ki paidbah kiba wan sumar ha kane ka PHC bad kane kan iarap shibun ïa ki paidbah ha kaba kim donkam shuh ban leit shaduh sha jngai ban leh ïa ka x-ray bad ultrasound ha kaba bunsien ki briew jong ka thaiñ ki hap ban iaid ïa ka lynti kaba jngai bha ban ïoh ïa ki jingsumar ba biang khamtam ban leh ïa ki x ray bad ultrasound hynrei ka jingïoh ïa kine ka machine ka long ka jingkyrkhu ïa ki paidbah ka thaiñ.
U la ai ka jingkhublei ïa ka DMFT Executive Committee kaba la lah ban wanrah ïa kine ki machine ha kane ka PHC bad ha kajuh ka por yn sa shna ruh ïa ki kamra ban buh ïa kine ki machine.
“Hooid lada phai sah ki por kiba la leit, ki paidbah kiba ïa jan bad kane ka PHC bad ki paidbah jong ka elaka Narpuh, ngi mad shibun ki jingeh khamtam ha ki kam ba iadei bad ka koit ka khiah, namar tang na ka bynta ka x ray bad ultrasound ngi hap ban iaid da ki spah kilo mitar ban ïoh ban leh na ka bynta ban ïoh ïa ka koit ka khiah, don ruh kiba leit shaduh kallain, sa Silchar, sha Jowai, Shillong, Guahati, la shu lut ei ka por bad ka jinglut ksan, don ki por hap kiew kali na kawei ka station sha kawei ka station ban ïoh phah leh ïa ka jingdonkam, nga sngew ba kane ka sngi ka dei ka sngi ka jingkykhu ïa ngi, kum ki khun ka shnong bad ki shong kiba don sawdong kiba hap hapoh kane ka PHC Lumshnong bad kane kan iarap shibun ïa ki paidbah namar kine ki machine kin iarap ban pynïoh jingtip kloi ïa ka jait jingpang ba don ha ka met bad kan kloi ruh ka jingsumar na ki doctor”
Kiba la ïa don ryngkat lang ha katei ka sngi, ki kynthup ruh, u DM& HO East Jaiñtia Hills District, u Dr D.Shylla, u Management Representative jong ka Star Cement Company, u Devander Bansal, u Senior Manager Star Cement, u Siddharth Banerjee, ki nongshong shnong jong ka Lumshnong, ki nongtrei jong ka tnat koit ka khiah bad kiwei kiwei.
