Shillong, Nailur 06 : Ka Myntri ka tnad ka Koit ka Khiah ka sorkar jylla Kong Ampareen Lyngdoh ha ka sngi Ba-ar ka la ong ba ka sorkar jylla kan sa shim rai shen haba ïadei bad ka jingujor ba ki ïoh pdiang kaba ïadei pyrshah ïa ki samla pule ba pynkhreh leit pule doktor na bhah jong ka sorkar jylla.
“Mynta u Myntri Rangbah u don shabar ka jylla bad kumta la kumno kumno ngin kynduh ha ka sngi Nyngkong ban wan ban shim rai halor kane ka bynta,” ong ka Myntri haba kren bad ki lad pathai khubor.
Katei ka jingkren jong ka Myntri kadei halor ka jingkylli kaba ïadei bad ka jingujor jong ka KSU kaba dawa ba dei ban weng noh ïa ka kyrteng jong ki 10 ngut ki samla pule ba pynkhreh pule doktor na ka Open Category halor ka nongrim ba kim lah ban phah ad ki kot ki sla kiba biang kynthup naduh ka Permanent Residential Certificate (PRC) kaba long katkum ka jingbthah da ka DHS.
“Ïa mynta ngim pat lah ban ong ei ei halor kane namar ngim dei ka bor ban weng kyrteng haba ïadei bad ka jingphah ïa ki kot ki sla jong ki DC jong ka District. U Myntri Rangbah ruh u la tip halor kane ka bynta bad shen yn sa shim rai halor kane,” bynrap biang ka Myntri.
Lah ban kdew hangne ba ka KSU ha ka shithi ujor, ka la ong ba ka jingbym phah lang ïa ka PRC kum kawei na ki kot ki sla ba donkam ka la pyni lypa ba dei ban shah kyntait ïa kum kitei ki kyrtong da kaba ong ruh ba wat ki birth certificate kiba bakla ruh donkam ban da pynlong ka jingtohkit kaba bniah ban lap kumno ïa kum kitei ki kot ki sla la ai da ki bor bahalor.
