Khliehriat, Nailur, 6: Ki nongïalam jong Jaiñtia National Council (JNC), ba la lamkhmat da President u Bah Sambormi Lyngdoh, ha ka sngi Balang ki la ïakynduh ïa u Symbud Myntri Rangbah ka jylla u Bah Sniawbhalang Dhar ban dawa ba ka Sorkar Meghalaya ka dei ban phah da ka jingthoh sha ka Sorkar Assam ba kan pynphai noh ïa ka thaiñ Block-I sha ka Jylla Meghalya.
Ha kaba ïadei bad ki kam ïakajia pud, u Bah Sniawbhalang Dkhar u la ong ba ka Sorkar ka ladep ban phah shithi sha ka Sorkar Assam ban pynphai biang ïa ki shnong Pnar kiba don ha Block-1 bad mynta ka Sorkar ka dang ap ïa ka jubab na ka sorkar Assam.
Halor ka Ïawmusiang Market Complex, u Symbud Myntri Rangbah u la ong ba u ladep phah peit ïa ka Building halor ki Iron Post lada ki dang long neem ban ïoh shna noh.
Katba halor ka Mini Secretariat ha Jowai, u Bah Dhar u la pynpaw ba ka tnat PWD ka la sdang ban pynkhreh ïa ka Drawing jong ka Building bad shen yn sa sdang ban shna noh.
U la kular ruh ban shimkhia bad ba un buddien ha kaba ïadei bad ka Residential School bad ka Teacher’s Training Centre kiba don ha East Jaiñtia Hills District bad un sa shong ban pyrkhat lang ruh bad u Bah Kyrmen Shylla uba long ruh u MLA jong ka Khliehriat Constituency bad u Myntri Sorkar ban ïa phylliew jingmut halor kine.
Ka JNC ka la ong ba ha kane ka jingïakynduh bad u Symbud Myntri Rangbah ka jylla, u la kular ban shimkhia ban leh ïa kaba donkam.
