Ïoh jinghikai ki khynnah skul ka Tep Kyndait Government U.P na ka ‘World Drug Day’

Jowai, Jylliew, 26: Ka Tep Kyndait Government U.P. School, Tuber Kmaichnong ryngkat ka jingïasnohkti lang ka Student Police Cadets, SPC jong ka skul, ka la pynlong ïa ka Awareness Prokram halor ka theme “The harmful impact of drug abuse” mynta ka sngi 25.06.2025 kum shibynta ban pyndon burom ïa ka World Drug Day kaba ka pyrthei shityllup ka la leh lang.
Ïa ka prokram la pynïaid da u Headmaster jong ka skul, ma Riquoma Rq. Laloo bad la ïoh ïa ka jingpynshai na ki Resource Persons, kong Niwandaka Dkhar, ma David D Warjri, SI Lad Rymbai Police Out Post bad na ma Seibor Bamon, SI Lad Rymbai Police Out Post hapdeng ka jingïadonlang u ma Onickson Sumer, i/c Sub-Divisional School Education Officer, East Jaiñtia Hills District kum u Kongsan.
Ka kong Niwandaka ka la batai bniah shaphang u Drok ba u don ha ki ar bynta, kawei ka long ka Medicinal Drug bad ka Illegal drug, da kaba ong ba ha kawei ka liang u long dawai babha bad ha kawei pat ka liang u long u jingdih ba pyrshah ïa ka aiñ. Ka la ai ka jingsneng jingkraw ïa ki khynnah skul, ba ym dei dalei lei ruh ban ktah ne mad, ïoh kin shah ngop, kumba shah ngop ha ka ruh.
U ma Bamon ula batai ïa ki kam kiba ka Police Department ka trei borbah ban ïaleh pyrshah ban lait na ka jingbun jong ka jingwan u drok shapoh ka shnong jong ngi. ula ong ruh ba, ka Lad Rymbai Out Post, kadei ka jaka rung jaka mih ki briew ba bunjait na kylleng, ka la pynlong ïa ki ban trei miet la bad sngi na ka bynta kane.
Ha ka jingkren jong u SI Warjri, ula batai shaphang ka jing bunjait ki drok kiba ma ki, na ka liang ki police ki la ïaleh tyng eh ban tem ban pynduna wat ban pynduh jait ruh shapoh ka shnong ka thaw. Ula batai da kaba ong, ba don shibunjait ki drok, tangba ymdei ban ngop ha ka jingshah pynbeij jong kiwei. Ula batai ruh, ba don ka aiñ kaba eh bha, kaba ki khot ka NDPS Act, kaba lah ban set patok ïa ki nongdie, katkum ka jingïoh kem ka jong ki.
La sam ïa ki khusnam sha ki nongjop jong ka Drawing Competition halor katei hi kajuh ka phang, kaba la pynlong da ka skul ha ka 25.06.2025. Kiba jop ki long, ka Banisha Lyngdoh ha ka first position; ka Wanbiang Lyngdoh ha ka second position bad ka Dhwani Shylla ha ka third position.
Na ka liang u Onickson Sumer, haba kren kum u kongsan, ula ai ka jingbatai shibun eh da kaba ai ki nuksa ba bha, ba ki khynnah skul kimdei ban ktah tang ïa u biri u sikret ruh, namar kine dei ka jingsdang kaba lah ban ïalam sha ka jingdih bymlah shuh ban kiar. Ula ai nuksa ba, bun sha nongkyndong ki shait phah pynmeh ding ïala u biri ne sikret ha la ki jong ki khun. U la ong ba ki khynnah kimdei ban pdiang ïa kane, jubab bait ïa la u kpa ne u mama, ba ngim ymlah ban leh ïa kane, kum ki khynnah. Ula ong ba shisien ba langop, la ïeh ban btat ïa u kynjri jong ka, kumta ymdei dalei lei ruh ban mad, ha kajuh kapor wat ngait ïa ka jingkhot jong kiwei ban ïangoplang ha ka apot jong u drok.
Ïa ki kyntien ai khublei la ïoh na u Pynshngaiñ Phawa, Assistant Teacher jong katei ka skul, ha kajuh ka por u la pynkynmaw ïa ki aiñ shnong ba, dalei lei ruh ka shnong hi kam shah ïa kino kino ki khynnah badon hapoh 18 snem ka rta ban leit thied sikret ne kiad. Lada lap ka shnong kan pyn shitom da kaba eh bha, bad la kyntu ïa ki khynnah skul ba kim dei ban leit lada don ba phah ïa ki ruh.
Ha kane ka sngi lashim ruh ïa ka jingsmai ban pyrshah na ka jing pyndonkam ïa u drok.