Khliehriat, Jylliew, 26: Ka Tep Kyndait Government UP School, Tuber Kmaishnong, East Jaiñtia Hills District ha ryngkat ka jingiasnohkti lang ka Student Police Cadets (SPC) jong ka skul, ka la pynlong ïa ka prokram ba kyrpang, ka International Day Against Drug Abuse and Illicit Trafficking ha kaba ka phang pdeng jong kane ka sngi ka dei “Ka jingma kaba mih na ka jingdih drok”
U Sub-Divisional School Education Officer, East Jaiñtia Hills District, u bah Onickson Sumer, u la long kum u kongsan bad u la ai shibun ki jingbatai ha kaba ïadei bad u drok da kaba ai shibun ki nuksa ruh ba ki khynnah kin shai ha kaba ïadei bad ka jingshyrkhei u drok, u kyntu jur ïa ki khynnah skul ba kim dei da lei lei ruh ban ktah wat tang ïa u biri, u sikret ruh namar kine dei ka jingsdang kaba lah ban ïalam sha ka jingkyrni ka ban nym lah shuh ban kiar “Bun sha nongkyndong ki shait phah pynmeh ding ïa u biri ne sikret ha la ki jong ki khun phi ki khynnah phim dei satia ban pdiang ne kohnguh ïa kane, phi dei ban jubab ïa la u kpa ne u mama, ba ngim lah ban leh ïa kane, kum ki khynnah namar shisien ba langop, la eh ban btat ïa u kynjri jong ka, kumta ymdei dalei lei ruh ban mad ïa kino kino ki jingdih ba sniew ha kajuh ka por phim dei ruh ban ngeit ïa ka jingkhot jong kiwei ban ïa ngop lang ha ka apot jong u drok” ong u kongsan.
U bah Pynshngaiñ Phawa, uba dei u nonghikai skul u la pynkynmaw ïa ki aiñ shnong ba dalei lei ruh ka shnong hi kam shah ïa kino kino ki khynnah kiba hapoh 18 snem kyrta ban leit thied sikret ne thied kiad bad lada lap ka shnong kan pyn shitom da kaba eh bha, kum u nonghikai u la kyntu ïa ki khynnah skul ba kim dei ban leit ne kohnguh lada don ba phah ïa ki.
Ha kane ka prokram ka kong Niwandaka Dkhar ka la ai ka jingbatai kaba bniah shaphang u drok bad ong ba u Drok u don ha ki ar bynta, kawei ka long ba u long kum ka dawai ha ka pang ka shitom lane ka Medicinal Drug bym long beaiñ bad ha kawei ka liang pat u long u jingdih ba pyrshah ïa ka aiñ, ka la ai ki kyntien sneng bad kyntu ïa ki khynnah skul ba kim dei da lei lei ruh ban mad ïa u drok namar kaba ma ioh ba kin ngop ha ki jingdih ba sniew.
Ki heh pulit kiba na Ladrymbai OP, u Sub Inspector, u bah David .D. Warjri bad na u bah Seibor Bamon ki la batai ïa ki kam kiba ka tnat pulit ka la trei borbah ha ka jingïakhun pyrshah ïa u drok ban lait na ka jingwan poi u drok shapoh ka shnong ki thaw, la ong ruh ba ka Lad Rymbai Out Post, kadei ka jaka rung jaka mih ki briew ba bunjait na kylleng bad ka pynlong ïa ki pulit ban trei miet la bad sngi na ka bynta ban peitngor ïa ka jingwan ki drok beaiñ.
U Sub Inspector Warjri, u la batai shaphang bunjait ki drok kiba na ka liang ki pulit ki la iakhun tyng eh ban tem ne tehlakam ban pynduna wat ban pynduh jait ruh hapoh ki shnong ki thaw, u kyntu jur ïa ki khynnah ba kim dei ban ngop ha u drok, ymdei ruh ban ngop ha ka jingshah pynbeij jong kiwei, la ong ba ka don ka aiñ kaba eh bha, kaba ki khot ka NDPS Act, kaba lah ban set patok ïa ki nongdie ne nongkhaiï drok.
Ha kane ka prokram la don ruh ka jingpule lang ïa ki kyntien jingkular ne ka Pledge kaba kren pyrshah ïa u drok.
Ha kane ka prokram, la sam ïa ki khusnam sha kiba jop ha ka jingiakop dro dur kiba dro halor katei phang pdeng bad kiba jop ki kynthup ka Banisha Lyngdoh kaba long ba nyngkong, ka Wanbiang Lyngdoh, kaba long ba ar bad ka Dhwani Shylla kaba long ba lai.
Ia ka prokram la pyniaid da u Headmaster jong ka skul Tep Kyndait Government U.P. School, Tuber Kmaishnong, u bah Riquoma Rq. Laloo.
