Ka Custom NER ka la pynpaw ïa ki jingma na u drok shabar ri, ka jingïatreilang bad ki tnad

Shillong, Jylliew 26: Ban rakhe ïa ka International Day Against Drug Abuse and Illicit Trafficking, ka Press Information Bureau, Shillong, ha ryngkat ka jingïatreilang bad ka Ophis jong u Commissioner, Customs (Preventive), NER Headquarters, Shillong, ka la pynlong ïa ka jingïakren bad ki lad pathai khubor hapoh ka ‘Varta’ ha CGST Hall, Shillong mynta ka sngi.
Kane ka prokram ka la wanrah lang ïa ki ophisar na ka tnad Customs bad ki dkhot jong ki lad pathai khubor na ka bynta ka jingïakren kaba bniah halor ka jingkiew ki jingma na ka jingkhaïi drok ha ka thaiñ shatei lammihngi bad ki lad pyntreikam ba la shim ban ïakhun pyrshah ïa ki.
Haba ai ka jingkren kaba bniah, u Bah Spencer M. Mylliem, Joint Commissioner, Customs, u la pynshai halor ki jinglong ba dang shen ha ka jingwanrah ïa ki drok na ka ri ba marjan ka Myanmar, da kaba pynpaw kumno la pyndonkam ïa kane ka thaiñ kum ka lynti ïaid bad kumjuh ruh kum ka jaka ba ju pyndonkam ïa ki drok. U la batai ïa ki rukom treikam ha ka jingkhaïi, ki sienjam pyntreikam ba kongsan, ki jingkurup kiba heh, bad ka bynta kaba kongsan jong ka jingïatreilang hapdeng ki tnad. “Ka thaiñ ka sakhi ïa ka jingkiew ha ka jingkhaïi tuh ïa ki drok synthetic, khamtam ïa u drok amphetamine, uba la khaïi bunsien na Myanmar. Kane ka ïadei bha bad ka jingbym shong shngaiñ ha ka kam saiñ pyrthei ha ka thaiñ bad ki jaka khappud kiba synjor”, la ong u Bah Mylliem.
U Joint Commissioner u la pynshai ba ka Customs (Preventive) NER ka la pynkhlaiñ ïa ki jingpyrshang lyngba ki lad ki lynti bapher bapher ha kylleng ki jylla ka thaiñ Shatei Lammihngi. U Bah Spencer u la ong ba ka tnad jong ki ka shaniah shibun ha ki nongpyntip, ki rukom ai khusnam, bad ka jingïatreilang hapdeng ki tnad, katba u la bynrap ba ki ophisar jong ka Custom ha kylleng ka thaiñ shatei lammihngi ki la ïoh ïa ki jingkurup kiba kongsan ha ka jingïatreilang bad ki BSF, Assam Rifles bad ki bor pulit jong ka jylla, kaba ïarap ban pynlong ïa ki jingkhynra lang bad ban buddien ïa ki jingtohkit. “Ka jingpyrshang pyntreikam jong ngi ka shong ha ka jingïoh jingtip ha ka por kaba biang bad ka jingïatreilang kaba khlaiï bad ki kynhun ba ïatreilang.Ki jingïalang lang man ka por bad ki jingtreikam lang ki long kiba kongsan bha,” u la bynrap.
Ha kane ka jingïalang la pyni ïa ka map jong ki lynti khaïi tuh ba kongsan ha kylleng ka thaiñ shatei lammihngi bad ka la pyni ïa ki katto katne ki jingïoh kurup dang shen. U Bah Mylliem u la ban jur ba ki jingtreikam jong ka Custom la kyrshan ruh da ki prokram ai jingtip paidbah bad ka jingïadei bad ki paidbah. “Ka jingthmu jong ngi kam dei tang ban tehlakam ïa ka jingpynbiang hynrei ban pynduna ruh ïa ka jingdawa. Ki buit treikam kiba jrong samoi ki dei ban kynthup ïa ka jingai jingsumar, ka jingpynkylla ïa ka aiñ, bad ka jingïatreilang bad ki paidbah”, u la ong. “Tang ka Custom kam lah ban ïakhun ïa kane ka thma. Ka donkam ïa ka jingkyrshan bad jingïatreilang kaba neh na baroh ki bor pynjari aiñ bad ki bor kiba ïadei bad ki kam khappud, ha ka ri bad kylleng ka pyrthei.”
Ha kane ka sngi la don lang ki ophisar jong ka Custom ba kynthup ïa u Deputy Commissioner u Hajong bad u Assistant Commissioner u Rasarshi Chakrabarty, nalor ki ophisar na ka PIB bad ki nongmihkhmat na ki lad pathai khubor bapher bapher. Ha kane ka jingïalang ïamir jingmut la ïohi ïa ki jingkylli ba la buh halor ki lynti khaïi pateng kiba dang mih, ka jinglong mynta ha Meghalaya, ka jingdonkti jong ki bar jylla, ki kynhun shna tiar beaiñ, bad ki jingpyrshang ban ïatreilang hapdeng ki ri lyngba ki rynsan kum ka Customs Overseas Intelligence Network. Ka jingkylli kaba kongsan ka dei kaba ïadei bad ka Prevention of Illicit Traffic in Narcotic Drugs and Psychotropic Substances Act, 1988 (PITNDPS Act). Haba jubab ïa kane, u Bah Spencer M. Mylliem u la ban jur ba ka PITNDPS Act ka dang long ka atiar aiñ kaba khlaiñ bha, khamtam ha ki mukotduma kiba ïadei bad ki nongleh kam sniew kiba ju mlien ïa kine ki kam bad kiba don jingïadei bad ki kynhun khaïi drok ba la skhem. La pynpaw ruh ïa ki jingsngewkhia shaphang ka jingduna ki nongtrei, bad ka jinglong jingman jong ki jingshah rai pynrem ha ka aiñ.
Kum shi bynta ban rakhe ïa kane ka sngi, ka Ophis Customs, Shillong ka la pynlong ruh ïa ka jingïakop thoh Slogan/Poster bad ïakop thoh poitri halor ka phangpdeng”Mission – Drug Free Campus.” Ki khynnah skul na san tylli ki skul ba pawnam-ka Loreto Convent, ka Shillong Public School, St. Edmund’s Higher Secondary School, Army Public School, bad ka Duncan Secondary School- ki la ïashim bynta shitrhem ha kane ka prokram. Ki samla nongïashim bynta ki la pynpaw ïa ki jingmut bad ki jingsngew jong ki halor ki jingma kiba mih na ka jingdih drok lyngba ki dur kiba khlaiñ bad ki poitri kiba ktah ïa ka mynsiem.