Nongpoh, Jylliew 26: U MLA ka Jirang Constituency u Bah Sosthenes Sohtun mynta ka sngi hakhmat u Myntri Rangbah ka jylla, u la pynpaw ba kum u nongmihhmat paidbah u angnud ban don sa kawei ka ophis C&RD Block ha Jirang Constituency.
Kane ka jingïoh lad u Bah Sosthenes Sohtun ban pynpaw halor ka jingdonkam sa kawei ka ophis C&RD Block ha Jirang Constituency, ka dei hadien ba mynta ka sngi u Myntri Rangbah ka jylla, u Conrad K. Sangma u la wan ban don ryngkat ha ka jingplie ïa ka ophis building ba thymmai ka Umling C&RD Block ha Ri Bhoi District.
Kum u MLA ka Jirang Constituency, u Bah Sosthenes Sohtun u la shim ïa ka kabu ban kyrpad na u Myntri Rangbah ba ka sorkar kan thaw lad ruh ban pynkha sa kawei ka ophis C&RD Block ha Jirang Constituency, da kaba kam ba ka Jirang C&RD Block ka la heh bad ka hap ban ai ka jingshakri ïa kiba bun ki shnong bad la jin ba ka sorkar kan ai sa kawei ka ophis C&RD Bloc kan long shisha ka jingmyntoi na ka bynta ka roi ka par ki paidbah.
Shuh shuh, kumba u la pynpaw, u la ai ruh ka jingïaroh ïa u myntri rangbah bad ïa ka sorkar ba ka don ïa kata ka thong ban kyntiew ïa ka roi ka par ki paidbah bad u khmih lynti ruh ba lada ïoh biang sa kawei ka ophis C&RD Block ha Jirang kane kan dang pynïajan ka jingshakri hapdeng ka sorkar bad ki paidbah ba kin dang kiew shaphrang ha baroh ki liang jong ka jingim, u la bynrap.
