Shillong, Naitung 17 : Ki khraw pyrkhat ha ka Ktien Khasi ki la pynlong ïa ka jingïatai bad ka jingïamir jingmut kaba sani bha halor ka jingdonkam bad ki jingmyntoi ha ki liang bapher bapher lada ka Ktien Khasi ka ïoh ban rung noh ha ka Khyrnit kaba Phra jong ka Riti Synshar jong ka Ri.
Ïa katei ka jingiatai la pynlong da ka Khasi Department jong ka Sankardev College, Shillong da ka jingtreilang bad ka tnad Arts and Culture ka sorkar jylla ha kaba u Myntri katei ka tnad, Bah Paul Lyngdoh u la long u Kongsan.
Na ka liang u Myntri haba kren ha katei ka rynsan la pyntip ba ka sorkar jylla ka la shimkhia bha halor kane ka bynta ban ïai buddien khnang ba ka Ktien Khasi kan ïoh ban rung noh ha katei ka Khyrnit.
Ki khraw pyrkhat ha ka Ktien Khasi kiba wan ban donlang ha kane ka sngi ki kynthup naduh u Prof. DRL Nonglait uba la wan na ka liang ka Khasi Authors Society bad kum u Head jongka Khasi Department NEHU, nangta Bah Erwin KSutnga kum u riewsaid-aiñ, Dr. B. Khyriem na ka liang ka Linguistics bad Professor ka Linguistics Department NEHU kumjuh i Prof Streamlet Dkhar kum ka dkhot jong ka Khasi Authors Society bad ka Sahitya Academy.
Kitei ki riewshemphang ki la ai jingpynshai ha la ki jong ki jong ki jingstad ba la pyntbit ha ka jingïatai kaba sngewtynnad bha kaba la pynïaid da i Dr. SukjaiSwer, Head jong ka Khasi Department PG section, Sankardev College.
Shwa kane, la pdiang sngewbha ïa kane ka jingïamir jingmut da ka Principal jong ka College, Dr. Eureka F P Lyngdoh bad ruh na u IQAC Coordinator Bah Manbor S Warjri.
Ha kane ka jingïamir jingmut la wan ban shim bynta da ki nonghikai bad ki khynnah pule jong ki college bapher bapher kiba don ha ri Khasi nalor ki nongïalam jong ki katto katne ki sengbhalang kiba la pyntylli lang ïa ka sur ban ïaid shakhmat ban ai jingkyrshan khnang ba kane ka jingdawa ba donkam kan ïoh ban urlong noh kham kloi.
