Shillong, Naitung 17 : U Ksiang jong ka seng Hynniewtrep National Liberation Council (HNLC) u Bah Sadon K Blah ha ka sngi Nyngkong ula ong ba ka jingïakren ïasuk hapdeng ka Sorkar pdeng, sorkar jylla bad ka HNLC kala ïaid ha ka lynti kaba dei.
Haba ïakren bad ki nongthoh khubor, u bah Sadon ula ong “Haba ïadei bad ka jingkren ïasuk ka Sorkar Pdeng, Sorkar Jylla bad HNLC, ngi la sdang ha u bnai Jylliew jong u snem ba la lah. Ka la ïaid la shisnem mynta hynrei ki kam ki la nang ïaid ha ka lynti kaba dei bad kam don satia kano kano kaba ïaid kynriang”.
Ula pyntip ba ka Sorkar Pdeng, Sorkar Jylla bad ki Dkhot ka HNLC ki la shong jingïalang la bun sien. Kat kum ka jingong jong u, kumba 6-7 sien ki jingïalang ki la long ha kane ka shisnem”.
Ula ong “Kaei ka jingïakren kaba mih, ngim shym la lap ba kan ïaid kynriang lait noh tang ki kam technical bad ngin sa pynbeit ïa ki kawei hadien kawei pat. Shisien ba ka jingkren ïasuk ba pura kala sdang, kam don lynti shuh ban phai dien”.
“Ka jingdawa map noh ruh ka la mih hadien ka jingïalang bad ka Home Ministry lem bad artylli ki Sorkar. Ki dang ïashong bishar halor kane bad katba ngim pat ïoh jingpynshai, ngim pat lah ban kynthoh eiei nalor kane” ula ong.
